មនុស្សចំនួន ៥នាក់ បានបាត់បង់ជីវិត និង ២នាក់ បានរងរបួស នៅក្នុងការវាយប្រហារដោយការប្រើធ្នូ នៅឯទីក្រុង Kongsberg ប្រទេសន័រវែស

បុរសម្នាក់ប្រដាប់ដោយធ្នូ និងគ្រាប់ព្រួញ បានបាញ់សម្លាប់មនុស្សចំនួន ៥នាក់ និងធ្វើឱ្យរបួសចំនួន ២នាក់ ផ្សេងទៀត នៅក្នុងប្រទេសន័រវែស នេះបើតាមការចុះផ្សាយរបស់សារព័ត៌មាន NHK ។ អាជ្ញាធរន័រវេសបាននិយាយថា ពួកគេបានទទួលរបាយការណ៍ជាច្រើនកាលពីល្ងាចថ្ងៃពុធ នៅពេលដែលបុរសម្នាក់កំពុងវាយប្រហារអ្នកដំណើរឆ្លងកាត់ទីនោះ ដោយការប្រើធ្នូ និងគ្រាប់ព្រួញ នៅឯទីក្រុង Kongsberg ជិតរដ្ឋធានីអូស្លូ ហើយអាជ្ញាធរក៏បានចាប់ខ្លួនបុរសនោះភ្លាមៗ បន្ទាប់ពីទទួលបានរបាយការណ៍។

អាជ្ញាធរបានជឿថា បុរសនោះបានធ្វើសកម្មភាពតែម្នាក់ឯង ហើយបានវាយប្រហារមនុស្សដោយចៃដន្យនៅពេលគាត់ដើរជុំវិញទីក្រុង។ ឥឡូវនេះប៉ូលីសកំពុងពិនិត្យរកមើលបំណងរបស់គាត់ រួមទាំងលទ្ធភាពនៃអំពើភេរវកម្ម។ គួរឱ្យដឹងដែរថា មន្ត្រីប៉ូលីសន័រវេសជាធម្មតាគឺមិនកាន់អាវុធនោះទេ ប៉ុន្តែអាជ្ញាធរបានបញ្ជាឱ្យពួកគេកាន់អាវុធបន្ទាប់ពីការវាយប្រហារនេះ។ ប្រព័ន្ធផ្សព្វផ្សាយក្នុងស្រុកបានពិពណ៌នាហេតុការណ៍នេះថា ជាការវាយប្រហារដ៏អាក្រក់បំផុតនៅក្នុងប្រទេសន័រវែស ចាប់តាំងពីបុរសម្នាក់បានសម្លាប់មនុស្សជាង ៧០ នាក់ ក្នុងឆ្នាំ ២០១១៕

អត្ថបទ៖ លីដា
ប្រភព៖ NHK