ក្រុមសិទ្ធិមនុស្សមីយ៉ាន់ម៉ាបាននិយាយថា ពលរដ្ឋប្រមាណ ១១០ នាក់ ត្រូវបានចាប់ខ្លួនឡើងវិញភ្លាមៗ បន្ទាប់ពីពួកគេត្រូវបានដោះលែង ហើយក្នុងនោះក៏រួមជាមួយនឹងអ្នកទោសនយោបាយមួយចំនួនផងដែរ។ រំលឹកផងដែរថា ក្នុងរយៈពេលចុងក្រោយនេះ យោធា​មីយ៉ាន់ម៉ា​បាន​ចាប់​ផ្តើម​ដោះលែង​ពលរដ្ឋ​ជាង ៥,៦០០ ​នាក់​ ដែលភាគច្រើនពួកគេត្រូវបានចាប់ខ្លួននៅអំឡុងពេលមានការតវ៉ាប្រឆាំងនឹងរដ្ឋប្រហារ ដោយសារតែមានសម្ពាធជាច្រើនពីអន្តរជាតិ។ ប្រភពបាននិយាយថា ពលរដ្ឋ​ទាំង​នោះ​ត្រូវ​បាន​ចាប់​ខ្លួន​ប៉ុន្មាន​ម៉ោង​ បន្ទាប់​ពី​ពួកគេបាន​ជួប​ក្រុម​គ្រួសារ ឬ​សូម្បី​តែមិនទាន់ចេញផុតពី​មាត់​ទ្វារ​ពន្ធនាគារ។ នេះគឺជាទម្រង់នៃការធ្វើទារុណកម្មផ្លូវកាយ និងផ្លូវចិត្តសម្រាប់អ្នកទោសនយោបាយ និងក្រុមគ្រួសាររបស់ពួកគេ។

ស្ថានភាព​ក្នុង​ប្រទេស​មីយ៉ាន់ម៉ា​បាន​និង​កំពុង​ប៉ះពាល់​ដល់​នយោបាយ​នៃ​សមាគម​ប្រជាជាតិ​អាស៊ីអាគ្នេយ៍ (ASEAN) ខណៈអាស៊ាន​ផ្ទាល់ក៏បានសម្រេច​ដក​ឧត្តមសេនីយ​មី​យ៉ាន់​ម៉ាលោក មីន អ៊ុង​ឡាំង ចេញពី​កិច្ចប្រជុំ​កំពូល​របស់ខ្លួន​នៅ​សប្តាហ៍​ក្រោយ ហើយនេះ​ជា​រឿង​មិន​ធ្លាប់​មាន​ក្នុង​ប្រវត្តិសាស្ត្រ​អាស៊ានឡើយ។ ជាមួយគ្នានេះដែរ រដ្ឋមន្ត្រីការបរទេសម៉ាឡេស៊ីលោក Saifuddin Abdullah បាននិយាយកាលពីថ្ងៃព្រហស្បតិ៍ថា អាស៊ានគួរតែគិតឡើងវិញនូវគោលនយោបាយមិនជ្រៀតជ្រែករបស់ខ្លួន ហើយគួរតែគិតគូដល់បញ្ហារបស់ប្រទេសក្នុងអាស៊ានចំនួន ៩ ផ្សេងទៀតផងដែរ ដោយបន្ថែមថា៖«ពួកយើងមិនអាចយកគោលនយោបាលមិនជ្រៀតជ្រែកមកដាក់មុខបានទេ នៅពេលដែលបញ្ហាត្រូវបានលើកឡើង»។

ជាមួយគ្នានេះ បេសកជនពិសេសរបស់អង្គការសហប្រជាជាតិប្រចាំប្រទេសមីយ៉ានម៉ា បានប្រាប់មហាសន្និបាតកាលពីថ្ងៃព្រហស្បតិ៍ថា ស្ថានការណ៍នៅប្រទេសមីយ៉ានម៉ាគឺកាន់តែយ៉ាប់យ៉ឺន។ លោកស្រី​បាន​ព្រមាន​ថា ឱកាស​វិល​ត្រឡប់​ទៅ​រក​លទ្ធិប្រជាធិបតេយ្យ​គឺកាន់តែស្ដួចស្ដើង ដោយ​បន្ថែម​ថា វា​ជា​រឿង​សំខាន់​ដែល​រដ្ឋាភិបាលនានា និង​អង្គការ​សហ​ប្រជាជាតិ ​មិន​មាន​សញ្ញា​ទទួល​ស្គាល់​របប​យោធា​ណា​មួយ​៕

អត្ថបទ៖ លីដា
ប្រភព៖ NHK