ព្រះនាងម្ចាស់ Mako របស់ប្រទេសជប៉ុន និងគូដណ្តឹង នឹងរៀបចំពិធីអាពាហ៍ពិពាហ៍នៅថ្ងៃនេះ

យោងតាមការចុះផ្សាយរបស់សារព័ត៌មាន NHK បានរាយការណ៍ថា ព្រះនាងម្ចាស់ Mako របស់ប្រទេសជប៉ុន និងអតីតមិត្តរួមថ្នាក់របស់ព្រះនាង ដែលធ្លាប់រៀនជាមួយគ្នានៅមហាវិទ្យាល័យ Komuro Kei នឹងប្រារព្ធពិធីរៀបអាពាហ៍ពិពាហ៍ នៅថ្ងៃអង្គារ ទី២៦ ខែតុលា ឆ្នាំ២០២១ នេះផ្ទាល់។ ប្រភពបាននិយាយថា ភ្នាក់ងាររបស់គ្រួសារអធិរាជជប៉ុន (Imperial Household Agency) នឹងត្រូវធ្វើការចុះបញ្ជីអាពាហ៍ពិពាហ៍ជួសមុខឱ្យអ្នកទាំង ២ ជាមួយនឹងអភិបាលក្រុង ខណៈការចុះបញ្ជីនេះនឹងសម្គាល់ការចាកចេញរបស់ព្រះនាងពីគ្រួសាររាជវង្ស។ ព្រះនាងមានសិទ្ធិទទួលបានប្រាក់ទូទាត់ថ្លៃរៀបអាពាហ៍ពិពាហ៍ ក៏ប៉ុន្តែព្រះនាងមិនទទួលយកប្រាក់ទាំងនោះឡើយ។

ជម្រាបផងដែរថា ព្រះនាង និងអនាគតស្វាមី នឹងមិនរៀបចំពិធីអាពាហ៍ពិពាហ៍តាមបែបប្រពៃណី ដូចជាសមាជិកគ្រួសាររាជវង្សដទៃឡើយ។ នៅ​ពេល​រសៀល ព្រះនាង Mako និងលោក Komuro នឹង​បង្ហាញ​ខ្លួន​នៅ​ចំពោះ​មុខ​អ្នក​កាសែត​ប្រហែល​ ៥០នាក់ ​នៅ​ឯសណ្ឋាគារ​មួយក្នុង​ទីក្រុង​តូក្យូ។ គូស្នេហ៍ទាំង ២ ក៏នឹងមិនឆ្លើយតបសំណួរ ដែលបានរៀបចំទុកជាមុនពីអ្នកសារព័ត៌មាននៅឯសន្និសីទនោះទេ ដោយពួកគេនឹងផ្តល់ចម្លើយជាលាយលក្ខណ៍អក្សរជំនួសវិញ។ ក្រុមមន្ត្រីបាននិយាយថា ការសម្រេចចិត្តនេះត្រូវបានធ្វើឡើងតាមការណែនាំរបស់វេជ្ជបណ្ឌិត បន្ទាប់ពីព្រះនាងមិនអាចទទួលយកខ្លឹមសារនៃសំណួរមួយចំនួន៕

អត្ថបទ៖ លីដា
ប្រភព៖ NHK