យោងតាមការចុះផ្សាយរបស់សារព័ត៌មាន BBC បានរាយការណ៍ថា ប្រទេសចិនបានរឹតត្បឹតទីក្រុងតូចៗរបស់ខ្លួន មិនឱ្យសាងសង់អគារខ្ពស់ៗនោះឡើយ ដែលជាផ្នែកមួយនៃការបង្ក្រាបគម្រោងឥតប្រយោជន៍។ ពោលគឺទីក្រុងដែលមានប្រជាជនតិចជាង ៣ លាននាក់ នឹងត្រូវបានដាក់កម្រិតលើការសាងសង់អគារខ្ពស់ៗលើសពី ១៥០ ម៉ែត្រ (៤៩២ហ្វីត) ហើយសម្រាប់ទីក្រុងដែលមាន​ប្រជាជន​ច្រើន​ជាងនោះ ​នឹង​មិនអាចមានអគារខ្ពស់ជាង ២៥០ ម៉ែត្របានទេ។ ​ការ​ហាម​ប្រាមចំពោះ​អគារ​ខ្ពស់​ជាង ៥០០ ម៉ែត្រ ក៏បានដាក់ឡើងជាយូរមកហើយដែរ។

គួរឱ្យដឹងដែរថា ប្រទេស​ចិនមាន​អគារ​ខ្ពស់​បំផុត​ក្នុង​ពិភពលោក​មួយ​ចំនួន ​រួម​មាន​អគារ Shanghai Tower ដែលមានកម្ពស់ ៦៣២ ម៉ែត្រ និង​មជ្ឈមណ្ឌល​ហិរញ្ញវត្ថុ Ping An ដែលមានកម្ពស់ ៥៩៩.១ ម៉ែត្រ ក្នុង​ទីក្រុង Shenzhen ខណៈដែលគម្រោងដែលគ្មានប្រយោជន៍ក៏បានរីកដុះដាល។ ជាកស្ដែងកាលពីដើមឆ្នាំនេះ មានមនុស្សរាប់រយនាក់បានភៀសខ្លួនចេញពីតំបន់ជិត SEG Plaza នៅទីក្រុង Shenzhen នៅពេលដែលអគារ Skyscraper កម្ពស់ ៣៥០ ម៉ែត្រមួយនោះ បានចាប់ផ្ដើមរង្គើរ។

ប្រទេសចិនបាននិងកំពុងចាត់វិធានការកាន់តែខ្លាំងឡើង ចំពោះគម្រោងឥតប្រយោជន៍ដែលមានតម្លៃថ្លៃ  ដោយបានរិះគន់អ្នកអភិវឌ្ឍន៍ក្នុងស្រុកមួយចំនួន ពីការឈ្លក់វង្វេងក្នុងការសាងសង់អគាររបស់ពួកគេ។ កាលពីដើមឆ្នាំនេះផ្ទាល់ ប្រទេសចិនក៏បានចេញច្បាប់ប្លែកមួយផងដែរ ដោយពួកគេមិនអនុញ្ញាឱ្យមានការសាងសង់អគារណាដែលមានស្ថាបត្យកម្មមិនស្អាតនោះឡើយ។ ចំពោះអ្នក​ដែលហ៊ាន​អនុម័ត​គម្រោង​ដែល​បំពាន​នឹង​ច្បាប់​ថ្មី​ទាំង​នេះ​​គឺនឹង​ត្រូវ​ទទួល​ខុស​ត្រូវ​លើគម្រោងទាំងនោះពេញ​មួយ​ជីវិត ប៉ុន្តែប្រទេសចិនមិនបានបញ្ជាក់លម្អិតថានឹងដាក់ទោសបែបណាទេ៕

អត្ថបទ៖ លីដា
ប្រភព៖ BBC