យោងតាមការចុះផ្សាយរបស់សារព័ត៌មាន បាងកកប៉ុស្ដិ៍ បានរាយការណ៍ថា មន្ដ្រីប៉ូលីស​ថៃបាន​ចាប់ខ្លួន​ស្ត្រី​ ៤នាក់ ​ពី​បទ​ផលិត និង​លក់​ក្រដាសប្រាក់​ដុល្លារ​ក្លែងក្លាយ និង​រឹបអូស​បាន​ក្រដាសប្រាក់ ១០០ ដុល្លារ​ក្លែងក្លាយ បានប្រមាណជា ៥០,០០០ សន្លឹក។ នាយឧត្តមសេនីយ៍ Damrongsak Kittiprapat អគ្គស្នងការរងនគរបាលជាតិថៃបាននិយាយថា ជនសង្ស័យម្នាក់ក្នុងចំណោមពួកគេមានឈ្មោះថា Jirapat ហើយនាងត្រូវបានចាប់ខ្លួននៅផ្ទះមួយ ក្នុងសង្កាត់ Bang Len នៃខេត្ត Nakhon Pathom កាលពីថ្ងៃពុធ ពីបទក្លែងបន្លំក្រដាសប្រាក់ និងក្រដាសប្រាក់ដុល្លារអាមេរិកក្លែងក្លាយចំនួន ៥០,០០០ សន្លឹក។

បើតាម​ប្រសាសន៍របស់លោកឧត្តមសេនីយ៍បានឱ្យដឹងថា នាង Jirapat ដែលទំនងជាមេក្លោង គឺបាន​បង្ហោះ​លក់ក្រដាសប្រាក់​ក្លែងក្លាយ​នៅលើ​ហ្វេ​ស​ប៊ុ​ក ហើយ​ក្រោយមកអ្នក​ស៊ើបអង្កេត​បាន​រកឃើញថា​ នាង​គឺធ្លាប់ជា​សមាជិក​ក្រុម​ក្មេងទំនើង​ក្លែង​ក្រដាសប្រាក់​មួយផ្សេងទៀត​។ បន្ទាប់មកទៀត ប៉ូលីសក៏បានចាប់ខ្លួនជនសង្ស័យចំនួន ៣នាក់ ផ្សេងទៀត គឺនាង Pachara, Orathai និង Sirinrat ដែលក្រោយមកពួកបានសារភាពថា នាង Jirapat គឺជាអ្នកផលិតក្រដាស់ក្លែងក្លាយទាំងនោះ ហើយពួកគេទាំង ៣នាក់ ទើបតែបានចាប់ផ្ដើមប្រព្រឹត្តវាជាលើកដំបូងប៉ុណ្ណោះ។ យ៉ាងណាក៏ដោយមន្ដ្រីប៉ូលីសមិនឈប់ត្រឹមនេះទេ ដោយពួកគេនឹងតាមប្រមាញ់នាក់សមគំនិតផ្សេងទៀត៕

អត្ថបទ៖ លីដា
ប្រភព៖ បាងកកប៉ុស្ដិ៍