យ៉ាងហោចណាស់មនុស្សចំនួន ៨៩ នាក់ បូករួមទាំងកុមារចំនួន ១៧ នាក់ បានធ្វើតេស្តវិជ្ជមានជាមួយនឹងវីរុស Zika នៅក្នុងការផ្ទុះឡើងថ្មីមួយ នៅឯទីក្រុង Kanpur រដ្ឋ Uttar Pradesh ប្រទេសឥណ្ឌា។ វីរុស Zika ជាវីរុសចម្លងដោយមូសខ្លា ដែលត្រូវបានរកឃើញដំបូងក្នុងឆ្នាំ១៩៤៧ និងបានបង្កទៅជារោគរាតត្បាតក្នុងស្រុក (epidemic) នៅប្រទេសប្រេស៊ីលក្នុងឆ្នាំ២០១៥ នៅពេលដែលទារករាប់ពាន់នាក់ត្រូវកើតមកមានក្បាលតូចជាងធម្មតា ឬហៅថា microcephaly និងខួរក្បាលមិនដំណើរការ។

វាគឺជាការផ្ទុះលើកដំបូងសម្រាបរដ្ឋ Uttar Pradesh នៅក្នុងឆ្នាំនេះ ប៉ុន្តែករណីជាច្រើនត្រូវបានរាយការណ៍ពីរដ្ឋមួយចំនួនរបស់ឥណ្ឌាក្នុងប៉ុន្មានឆ្នាំថ្មីៗនេះ។ ករណីវីរុស Zika លើកដំបូងនៅក្នុងទីក្រុងឧស្សាហកម្ម Kanpur ត្រូវបានរកឃើញនៅថ្ងៃទី២៣ ខែតុលា ឆ្នាំ២០២១ ហើយចំនួនករណីបានកើនឡើងក្នុងសប្តាហ៍កន្លងមកជាបន្ដបន្ទាប់។ ឥឡូវនេះអាជ្ញាធរក៏កំពុងបង្កើនការឃ្លាំមើលរបស់ពួកគេចំពោះការផ្ទុះឡើងថ្មីៗ និងការលុបបំបាត់កន្លែងបង្កាត់ពូជរបស់មូសខ្លា ដើម្បីទប់ស្កាត់ការឆ្លងរាលដាលបន្ថែមទៀត។ យ៉ាងណាក៏ដោយ រហូតមកទល់នឹងពេលនេះ រដ្ឋ Uttar Pradesh នៅមិនទាន់មានករណីស្លាប់ដោយសារវីរុសនេះនៅឡើយទេ៕

អត្ថបទ៖ លីដា
ប្រភព៖ រ៉យទ័រ