ប្រធានាធិបតីអាមេរិកលោក ចូ បៃដិន បានឈានចូលដល់អាយុ ៧៩ឆ្នាំ កាលពីថ្ងៃសៅរ៍ ទី២០ ខែវិច្ឆិកា ឆ្នាំ២០២១ កន្លងទៅថ្មីៗនេះ ដែលធ្វើឱ្យគាត់ក្លាយជាប្រធានាធិបតីកំពុងកាន់តំណែង ដែលមានវ័យចំណាស់ជាងគេបំផុត។ លោក ចូ បៃដិន បានក្លាយជាប្រធានាធិបតីដែលមានវ័យចំណាស់បំផុត ក្នុងប្រវត្តិសាស្ត្រអាមេរិកក្នុងខែមករា នៅពេលដែលគាត់បានស្បថចូលកាន់តំណែងក្នុងអាយុ ៧៨ឆ្នាំ ហើយកំណត់ត្រាចាស់គឺបានទៅលើលោក Ronald Reagan នៅពេលដែលគាត់ចាកចេញពីសេតវិមានក្នុងវ័យ ៧៧ឆ្នាំ។

ជាមួយគ្នានេះដែរ លោក ចូ បៃដិន ក៏បានប្រកាសពីលទ្ធផលត្រួតពិនិត្យសុខភាពរបស់គាត់កាលពីថ្ងៃសុក្រ ដោយវេជ្ជបណ្ឌិតរបស់គាត់បាននិយាយថា គាត់ជាបុរសដែលមានសុខភាពល្អ ស្វាហាប់ ដែលស័ក្តិសមក្នុងការបំពេញភារកិច្ចរបស់ប្រធានាធិបតីដោយជោគជ័យ។ លោកប្រធានាធិបតីបាននិយាយថា គាត់មានសុខភាពល្អ ដោយនិយាយកំប្លែងថា គាត់ទន្ទឹងរង់ចាំការប្រារព្ធខួបកំណើតគម្រប់ ៥៨ឆ្នាំ របស់គាត់។ ជម្រាបដែរថា សុខភាព​របស់​លោក បៃដិន គឺ​តែងតែទទួលការចាប់អារម្មណ៍ ចាប់​តាំង​ពី​លោក​បាន​ចូល​កាន់​តំណែងជាប្រធានាធិបតីរបស់សហរដ្ឋអាមេរិក៕

អត្ថបទ៖ លីដា
ប្រភព៖ NHK