ចក្រភពអង់គ្លេសបាននិយាយថា វ៉ាក់សាំងបង្ការដូសជំរុញ ឬដូសទី៣ អាចផ្ដល់ការការពារពីមេរោគកូវីដ១៩ បំប្លែងខ្លួនថ្មី «អូមីក្រុង» បានពី ៧០ ទៅ ៧៥ ភាគរយ

អាជ្ញាធរសុខាភិបាលអង់គ្លេសបាននិយាយថា ការសិក្សាជាបឋមបានបង្ហាញថា ការចាក់វ៉ាក់សាំងបង្ការជំងឺ​ COVID-19 ដូសជំរុញ នឹងផ្តល់ការការពារពី ៧០ ទៅ ៧៥% ប្រឆាំងនឹងវ៉ារ្យ៉ង់ Omicron (អូមីក្រុង) ដែលមានចេញរោគសញ្ញា។ ទីភ្នាក់ងារសន្តិសុខសុខភាពកាលពីថ្ងៃសុក្របានចេញផ្សាយលទ្ធផលដំបូងនៃការសិក្សារបស់ខ្លួន ដែលបានធ្វើការសិក្សាលើមនុស្ស ៥៨១នាក់ ពាក់ព័ន្ធនឹងវ៉ារ្យ៉ង់ Omicron ហើយក្នុងចំណោមអ្នកចូលរួមមួយចំនួន គឺបានទទួលថ្នាំបង្ការចំនួន ២ដង ខណៈអ្នកផ្សេងទៀតបានចាក់ដូសជំរុញរួចរាល់។

លទ្ធផលបានបង្ហាញថា អ្នកដែលបានចាក់វ៉ាក់សាំង ២ដូស មានកម្រិតប្រឆាំងនឹងរោគសញ្ញានៃវ៉ារ្យ៉ង់ Omicron ទាបជាង បើប្រៀបនឹងវ៉ារ្យ៉ង់ Delta ។ ជាមួយគ្នានេះដែរ ពី ៧០ ទៅ ៧៥% នៃអ្នកដែលបានទទួលដូសជំរុញ ឬដូសទី០៣ គឺមិនមានរោគសញ្ញាអ្វីនោះទេ។ ទីភ្នាក់ងារព្រមានថា ការប៉ាន់ប្រមាណដំបូងទាំងនេះ គួរតែត្រូវបានសង្កេតដោយប្រុងប្រយ័ត្ន។ ខ្លួននិយាយថា ការស្រាវជ្រាវបន្ថែមទៀតគឺត្រូវការជាចាំបាច់ ដើម្បីកំណត់ថា តើដូសជំរុញនៅតែមានប្រសិទ្ធភាពប្រឆាំងនឹងវ៉ារ្យ៉ង់ថ្មីនេះបានប៉ុនណា។

ជម្រាបដែរថា ចក្រភពអង់គ្លេសបានកត់ត្រាករណីរបស់ Omicron បន្ថែមចំនួន ៤៤៨ ករណី កាលពីថ្ងៃសុក្រ ដែលនាំឱ្យចំនួនសរុបរបស់ Omicron កើនឡើងដល់ ១,២៦៥ ករណី។ ទីភ្នាក់ងារនេះនិយាយថា តាមល្បឿនបច្ចុប្បន្ន Omicron នឹងមានចំនួនច្រើនជាង ៥០% នៃចំនួនឆ្លងមេរោគ COVID-19 ទាំងអស់ នៅពាក់កណ្តាលខែធ្នូ។ ទីក្រុងឡុងដ៍កំពុងព្យាយាមធ្វើឱ្យមនុស្សគ្រប់រូប ដែលមានអាយុចាប់ពី ១៨ឆ្នាំឡើងទៅ ទទួលការចាក់ថ្នាំបង្ការដូសទី៣ ឬដូសជំរុញ នៅចុងខែក្រោយនេះ៕

អត្ថបទ៖ លីដា
ប្រភព៖ NHK