អ៊ីស្រាអែល​គ្រោង​នឹង​ផ្តល់​វ៉ាក់សាំង​ការពារ​ជំងឺ COVID-19 ​ដូស​ទី​៤ សម្រាប់​មនុស្ស​ចាស់ និង​បុគ្គលិក​ថែទាំ​សុខភាព ខណៈពេល​ដែលវ៉ារ្យ៉ង់ អូមីក្រុង កំពុងរីករាលដាលយ៉ាងឆាប់រហ័ស។ ប្រទេស​នេះ​បាន ​និង​កំពុង​ជំរុញ​ទៅ​មុខ ​ជាមួយ​នឹង​កម្មវិធី​វ៉ាក់សាំង​ឈាន​មុខ​គេ​លើ​ពិភពលោក ដោយបានចាប់ផ្តើមផ្ដល់វ៉ាក់សាំងដូសទី៣ នៅក្នុងខែសីហា ហើយប្រហែល ៤៤% នៃចំនួនប្រជាជនរបស់ខ្លួន ឬ ៤.១៧ លាននាក់បានទទួលវា។

បន្ទាប់មកចំនួននៃការឆ្លងបានធ្លាក់ចុះ ប៉ុន្តែបានកើនឡើងម្តងទៀតចាប់តាំងពីចុងខែវិច្ឆិកា នៅពេលដែលវ៉ារ្យ៉ង់ អូមីក្រុង ចាប់ផ្ដើមរីករាលដាល។ ករណីឆ្លងមេរោគថ្មីប្រចាំថ្ងៃ លើសពី ១,០០០ កាលពីថ្ងៃអាទិត្យ ជាលើកដំបូងក្នុងរយៈពេលប្រហែល ២ខែ ហើយក្រុមអ្នកជំនាញនៃរដ្ឋាភិបាលអ៊ីស្រាអែល បានផ្តល់អនុសាសន៍កាលពីថ្ងៃអង្គារថា ការចាក់ដូសទី៤ គួរតែត្រូវផ្តល់ឱ្យមនុស្សដែលមានអាយុ ៦០ ឆ្នាំឡើងទៅ និងបុគ្គលិកថែទាំសុខភាពបន្ថែមទៀត ដើម្បីការពារពួកគេពីមេរោគបំប្លែងខ្លួនថ្មី៕

អត្ថបទ៖ លីដា
ប្រភព៖ France24