អាជ្ញាធរអាមេរិកចង់លុប TikTok ចេញពី Play Store និង App Store នៅខែក្រោយនេះ ដោយសារបញ្ហាសុវត្ថិភាព

អាមេរិក៖ គណៈកម្មការទំនាក់ទំនងសហព័ន្ធ (FCC) ដែលមានមូលដ្ឋាននៅអាមេរិកកំពុងអំពាវនាវឱ្យក្រុមហ៊ុន Google និងក្រុម Apple  ហាមឃាត់កម្មវិធី TikTok នៅលើ Store របស់ពួកគេ នេះបើយោងតាមសេចក្តីរាយការណ៍របស់បណ្តាញសារព័ត៌មាន​ Daily Mail កាលពីល្ងាចថ្ងៃពុធ ទី២៩ ខែមិថុនាម្សិលមិញនេះ។ បើតាមលោក Brendan Carr ដែលជាស្នងការនៃគណៈកម្មការទំនាក់ទំនងសហព័ន្ធ (FCC) បានបង្ហោះសារនៅលើគណនី Twitter ផ្លូវការរបស់គាត់ថា TikTok គួរតែត្រូវបានលុបចោលពី Play Store និង App Store ដ្បិតកម្មវិធីរបស់ចិនមួយនេះបានកំពុងតែលួចប្រមូលទិន្នន័យអ្នកប្រើប្រាស់យ៉ាងច្រើននៅសហរដ្ឋអាមេរិក។

ប្រភពខាងលើបានបន្តថា ក្រៅតែពីបានបង្ហោះសារនៅលើបណ្តាញសង្គមជាសាធារណៈហើយ លោក Brendan Carr ក៏បានផ្ញើលិខិតផ្លូវការទៅកាន់អគ្គនាយកក្រុមហ៊ុន Google គឺលោក Sundar Pichai និងអគ្គនាយកក្រុមហ៊ុន Apple គឺលោក Tim Cook ផងដែរ ដោយនៅក្នុងលិខិតនោះបានរៀបរាប់យ៉ាងលម្អិតអំពីមូលហេតុដែលត្រូវលុប TikTok ចេញពី Play Store និង App Store ខណៈឱសានុវាទនៃការលុបនោះគឺនៅត្រឹមថ្ងៃទី ៨ ខែកក្កដាខាងមុខនេះ។

នៅចំពោះមុខចំណាត់ការដ៏តឹងរឹងរបស់អាជ្ញាធរអាមេរិកនេះ ក្រុមហ៊ុន TikTok ដែលមានមូលដ្ឋាននៅក្នុងទីក្រុងប៉េកាំងប្រទេសចិនបានបើកកិច្ចប្រជុំផ្ទៃក្នុងជាច្រើនដងរួចមកហើយ តែរហូតមកទល់នឹងពេលនេះគេនៅមិនទាន់ឃើញក្រុមហ៊ុនខ្នាតយក្សរបស់ចិនមួយនេះធ្វើការឆ្លើយតបជាផ្លូវការយ៉ាងណានៅឡើយទេ តែគេរំពឹងថាការចរចារគ្នាដើម្បីស្វែងរកកិច្ចសម្របសម្រួលអាចនឹងកើនមាននៅក្នុងពេលឆាប់ៗនេះ៕

អត្ថបទ៖ ភក្តី

ប្រភព៖ Daily Mail