ជប៉ុន៖ មេដឹកនាំនៅជុំវិញពិភពលោកបានផ្តើមបញ្ចេញប្រតិកម្មព្រមៗគ្នាជុំវិញករណីបាញ់ប្រហារលោក Shinzo Abe ដែលជាអតីតនាយករដ្ឋមន្ត្រីជប៉ុន។​ គួរបញ្ជាក់ថា ហេតុការណ៍បាញ់ប្រហារនេះបានឡើងកាលពីវេលាម៉ោង ១១ កន្លះ ព្រឹកថ្ងៃសុក្រ ទី៨ ខែកក្កដានេះក្នុងអំឡុងពេលដែលលោក Shinzo Abe កំពុងថ្លែងសន្ទុរកថាមួយនៅក្នុងទីក្រុងណារ៉ា ភាគខាងលិចប្រទេសជប៉ុន ដើម្បីឃោសនាបេក្ខជនឈរឈ្មោះបោះឆ្នោតរបស់គណបក្សប្រជាធិបតេយ្យសេរី នៅមុនការបោះឆ្នោតសភាជាន់ខ្ពស់ ដែលគ្រោងនឹងរៀបចំឡើងនៅថ្ងៃអាទិត្យខាងមុខនេះ។​ ពេលនេះលោក Shinzo Abe ត្រូវបានបញ្ជូនទៅព្យាបាលនៅក្នុងមន្ទីរពេទ្យជាបន្ទាន់ នៅក្នុងស្ថានភាពដ៏គ្រោះថ្នាក់បំផុតមួយ​ ពោលគឺចង្វាក់បេះដូងរបស់គាត់ហាក់លែងដំណើរការទៅហើយ។

នៅចំពោះមុខស្ថានភាពនេះ ​លោកនាយក​រដ្ឋមន្ត្រី​អូស្ត្រាលី Anthony Albanese បាន​និយាយ​ថា វាគឺជារឿងដ៏​រន្ធត់បំផុតមួយដែលលោក Shinzo Abe ត្រូវ​រង​នូវការ​បាញ់​ប្រហារ ​ហើយអារម្មណ៍​របស់​យើង​នៅពេលនេះគឺ​កំពុងនៅ​ជាមួយ​ក្រុម​គ្រួសារ​របស់​លោក Shinzo Abe និង​ប្រជាជន​ជប៉ុនផងដែរ។ ​ឯកអគ្គរដ្ឋទូត​អាមេរិក​លោក Rahm Emanuel បាន​និយាយ​ថា យើងទាំងអស់គ្នា​ពិតជា​សោក​សៅនិង​រន្ធត់ចិត្ត​ណាស់ ចំពោះហេតុការណ៍​បាញ់​ប្រហារ​ទៅលើ​អតីត​នាយករដ្ឋមន្ត្រី​ជប៉ុន Shinzo​ Abe។ អ្នកនាំពាក្យរបស់​ក្រសួង​ការបរទេស​ឥណ្ឌូនេស៊ីគឺ​លោកស្រី Teuku Faizasyah ជួស​មុខ​ឲ្យ​ក្រុម​រដ្ឋមន្ត្រីការបរទេស G20 ក៏បាន​បង្ហាញ​នូវការ​អាណិត​អាសូរ​យ៉ាង​ខ្លាំងផងដែរ ចំពោះហេតុការណ៍អកុសល ដែលបានកើតឡើងចំពោះអតីតនាយករដ្ឋមន្ត្រីជប៉ុនរូបនេះ៕

អត្ថបទ៖ ភក្តី

ប្រភព៖ Channel News Asia