ជំនន់ទឹកភ្លៀងនៅអាមេរិកបានឆក់យកជីវិតពលរដ្ឋ ៧នាក់បន្ថែមទៀតធ្វើឲ្យតួលេខអ្នកបាត់បង់ជីវិតសរុបកើនដល់ ៣៥នាក់

អាមេរិក៖ ព្យុះភ្លៀងនៅតែបន្តគំរាមគំហែងនៅតាមតំបន់ភ្នំដែលស្ថិតនៅក្នុងរដ្ឋ Kentucky ភាគខាងត្បូងសហរដ្ឋអាមេរិក ហើយគ្រោះធម្មជាតិដ៏អាក្រក់នេះក៏បានឆក់យកជីវិតពលរដ្ឋអាមេរិកចំនួន ៧នាក់បន្ថែមទៀតផងដែរ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃអង្គារ ទី២ ខែសីហានេះ។ ដូចនេះបើគិតជាសរុបរួមត្រឹមពេលនេះគឺចំនួនអ្នកស្លាប់ដោយជំនន់ទឹកភ្លៀងនៅក្នុងរដ្ឋ Kentucky សហរដ្ឋអាមេរិកបានកើនដល់ ៣៥នាកហើយ។

បើតាមលោក Andy Beshear ដែលជាអភិបាលរដ្ឋ Kentucky បានប្រាប់ឲ្យដឹងថា ក្រៅតែបានរកឃើញអ្នកស្លាប់ ក៏នៅមានពលរដ្ឋជាច្រើននាក់ផ្សេងទៀតកំពុងជួបផលលំបាកយ៉ាងខ្លាំងផងដែរ ដោយក្នុងនោះមានពលរដ្ឋប្រមាណជា ៣០០នាក់ត្រូវជម្លៀសខ្លួនចេញពីផ្ទះសម្បែងរបស់ពួកគេនិងកំពុងស្នាក់នៅក្នុងតង់ជាបណ្តោះអាសន្ន។ ដោយឡែកពលរដ្ឋប្រមាណជា ១២,០០០នាក់ផ្សេងទៀតកំពុងរស់នៅដោយគ្មានអគ្គិសនីប្រើប្រាស់ និងមិនអាចធ្វើដំណើរចេញក្រៅបានជាធម្មតានោះទេ ដ្បិតផ្លូវត្រូវបានជន់លេចដោយជំនន់ទឹកភ្លៀងអស់ហើយ៕

អត្ថបទ៖ ភក្តី

ប្រភព៖ Channel News Asia