មុខងារ Crash Detection របស់ iPhone 14 តេរាយការណ៍ទៅប៉ូលិសឥតឈប់ ពេលម្ចាស់កំពុងជិះ Roller Coasters ព្រោះស្មានតែម្ចាស់មានគ្រោះថ្នាក់

អាមេរិក៖ មុខងារ Crash Detection របស់ទូរស័ព្ទ iPhone 14 ត្រូវបានគេមើលឃើញថា ហាក់កំពុងបង្ហាញនូវចំណុចអវិជ្ជមានមួយ ពោលគឺវាបានរាយការណ៍ពីករណីកើតមានឧបត្តិហេតុបន្ទាន់មួយ ខណៈដែលម្ចាស់ទូរស័ព្ទកំពុងតែធ្វើសកម្មភាពកំសាន្តដ៏រីករាយទៅវិញ។ គួរបញ្ជាក់ជូនថា មុខងារ Crash Detection ដែលមាននៅក្នុងទូរស័ព្ទ iPhone 14 គឺជាមុខងារដ៏ឆ្លាតវ័យមួយ ដែលអាចរាយការណ៍ទៅកាន់អាជ្ញាធរដោយស្វ័យប្រវតិ្តតាមរយៈការហៅទៅកាន់លេខ 911 នៅពេលដែលម្ចាស់ទូស័ព្ទបានជួបគ្រោះថ្នាក់ចរាចរណ៍ ឬឧបត្តិហេតុចៃដន្យណាមួយ ហើយបញ្ជូនទីតាំងកើតហេតុទៅឲ្យប៉ូលិសផងដែរ។

យ៉ាងណាក្តី បើយោងតាមការចុះផ្សាយរបស់បណ្តាញសារព័ត៌មាន The Verge កាលពីថ្ងៃអាទិត្យ ទី៩​ ខែតុលានេះបានឲ្យដឹងថា មានករណីខុសប្រក្រតីមួយបានកើតឡើងនៅសហរដ្ឋអាមេរិក ដោយមុខងារ Crash Detection បានរាយការណ៍ទៅកាន់លេខ 911 រហូតដល់ ៦ ដង ខណៈដែលម្ចាស់ទូរស័ព្ទកំពុងតែជិះ Roller Coasters នៅក្នុងឧទ្យានកំសាន្តមួយនេះនៅសួនកម្សាន្ត Kings Island នៃទីក្រុង Mason រដ្ឋ Ohio សហរដ្ឋអាមេរិក។ គួរកត់សម្គាល់ថា Roller Coasters គឺជាប្រភេទឧបករណ៍ជិះលេងកំសាន្តបែបរន្ធត់ ដោយវាអាចបើកឡើងចុះក្នុងល្បឿនយ៉ាងលឿន ហើយសកម្មភាពបែបនេះបានធ្វើឲ្យមុខងារ Crash Detection យល់ច្រឡំថា ម្ចាស់ទូរស័ព្ទកំពុងមានគ្រោះថ្នាក់ ហើយក៏បានរាយការណ៍ទៅកាន់អាជ្ញាធរដោយស័្វយប្រវត្តិតែម្តង៕

Roller Coasters 

អត្ថបទ៖ ភក្តី

ប្រភព៖ The Verg