រុស្ស៊ីបានទម្លាក់មីស៊ីលប៉ុន្មានគ្រាប់ទៅលើទីក្រុងគៀវ ដែលជាការឆ្លើយតបភ្លាមៗទៅនឹងការបំផ្ទុះស្ពានដែកនៅតំបន់គ្រីមៀ

រដ្ឋធានីគៀវរបស់អ៊ុយក្រែនត្រូវបានរង្គោះរង្គើដោយគ្រាប់មីស៊ីលជាបន្តបន្ទាប់នៅព្រឹកមិញនេះ ដែលជាការសងសឹករបស់លោក វ្ល៉ាឌីមៀ ពូទីន ឆ្លើយតបទៅនឹងការបំផ្ទុះនៅលើស្ពានគ្រីមៀ នេះបើតាមការចុះផ្សាយរបស់សារព័ត៌មាន Daily Mail។ វាបានកើតឡើងបន្ទាប់ពីភាពស្ងប់ស្ងាត់អស់ជាច្រើនខែនៅទីក្រុងគៀវ ខណៈមីស៊ីលបានហោះរំលងពេញផ្ទៃមេឃរបស់ទីក្រុង។ អភិបាលក្រុងលោក Vitalii Klitchko បានរាយការណ៍ថា ការផ្ទុះបានកើតឡើងនៅក្នុងសង្កាត់ Shevchenko នៅកណ្តាលទីក្រុង ប៉ុន្តែមិន​ទាន់​មាន​សេចក្តី​រាយការណ៍​ភ្លាមៗ​អំពី​អ្នក​ស្លាប់ ​និងរង​របួស​នោះ​ទេ។ ការវាយប្រហារនេះក៏គ្មានអ្វីគួរឱ្យភ្ញាក់ផ្អើលនោះដែរ ខណៈពេលដែលលោក វ្ល៉ាឌីមៀ ពូទីន កំពុងរៀបចំអង្គប្រជុំប្រធានសន្តិសុខនៅថ្ងៃចន្ទនេះផ្ទាល់ ដើម្បីពិភាក្សាអំពីការសងសឹកពាក់ព័ន្ធនឹងការបំផ្ទុះនៅស្ពានគ្រីមៀ ហើយគាត់បានហៅវាថាជា «ការវាយប្រហារភេរវកម្ម»។

អតីតទីប្រឹក្សារបស់លោក ពូទីន គឺលោក Sergei Markov បានអំពាវនាវឱ្យសងសឹកទៅទីក្រុងគៀវភ្លាមៗ នៅមុនកិច្ចប្រជុំក្រុមប្រឹក្សាសន្តិសុខចាប់ផ្ដើម ខណៈជនស៊ីវិលអ៊ុយក្រែន ក៏ត្រូវបានព្រមានដោយអភិបាលរងនៃតំបន់ Stavropol ភាគខាងត្បូងនៃប្រទេសរុស្ស៊ី គឺលោក Valery Chernitsov ផងដែរ ដែលគាត់បានរំពឹងថា នឹងមានការឆ្លើយតបយ៉ាងធ្ងន់ធ្ងរពីសំណាក់រុស្ស៊ី។ ក្នុង​វីដេអូ​មួយ​ដែល​បាន​បង្ហោះ​នៅលើ Twitter លោក​បាន​និយាយ​ថា​៖ ​«​ប្រជាជន​អ៊ុយក្រែន​ អ្នកត្រូវចេញ​ពី​ទីក្រុង​របស់​អ្នក ​ជា​ពិសេស​ទីក្រុង​ធំៗ។ ដោយសារតែការភ្ញាក់ផ្អើលដ៏ធំមួយកំពុងរង់ចាំអ្នក។ មីស៊ីល Sarmat ត្រៀមខ្លួនរួចជាស្រេចដើម្បីវាយប្រហារអ្នក»។ ជាក់ស្ដែងកន្លងមកក៏មានការភ័យខ្លាចយ៉ាងខ្លាំងផងដែរ ដែលថាប្រទេសរុស្ស៊ីកំពុងចាប់ផ្ដើមសាកល្បងនុយក្លេអ៊ែររបស់ខ្លួន។

យ៉ាងណាក៏ដោយ ប្រធានាធិបតីអ៊ុយក្រែនលោក Volodymyr Zelensky បានវាយបកទៅលើការអះអាងអំពីភេរវកម្មរបស់សមភាគីរបស់គាត់ ដោយគូសបញ្ជាក់ពីការវាយប្រហារដោយមីស៊ីលរបស់រុស្ស៊ីទៅលើតំបន់ Zaporizhzhia ដែលគាត់បាននិយាយថា វាបានសម្លាប់មនុស្សយ៉ាងហោចណាស់ ៤៣ នាក់ ក្នុងសប្តាហ៍នេះតែមួយ៕

មីស៊ីល RS-28 Sarmat ឬ Satan II 

ការបំផ្ទុះនៅស្ពានគ្រីមៀដែលបណ្ដាលឱ្យមានអគ្គិភ័យយ៉ាងសន្ធោសន្ធៅ

អត្ថបទ៖ លីដា
ប្រភព៖ Daily Mail