មន្ត្រីអន្តោប្រវេសន៍ថៃ បានចាប់ខ្លួនបុរសម៉ុងហ្គោលីម្នាក់ ដែលគេចពីដីកាចាប់ខ្លួន ហើយព្យាយាមរត់ភៀសខ្លួនចូលប្រទេសកម្ពុជា
យោងតាមសារព័ត៌មាន Thairath ដែលបានចុះផ្សាយកាលពីថ្ងៃទី១៧ ខែតុលា ឆ្នាំ២០២២ បានអោយដឹងថា លោកវរសេនីយ៍ឯក Rung Thongmon ប្រធានអន្តោប្រវេសន៍ខេត្តស្រះកែវ រួមនឹងលោកវរសេនីយ៍ទោ Pattanachai Phamonphiboon នាយប៉ុស្តិ៍នគរបាល Khlong Luek និង លោកវរសេនីយ៍ទោ Jirapat Khiaosiri អធិការនគរបាលទេសចរណ៍ស្រះកែវ បានដឹកនាំកងកម្លាំងចុះទៅត្រួតពិនិត្យ និងតាមចាប់ជនជាប់ចោទ ដែលរត់គេចពីដីកាចាប់ខ្លួន ដោយបានត្រៀមរត់ចេញទៅប្រទេសជិតខាង។ ក្រោយមកមន្ត្រីអន្តោប្រវេសន៍ខេត្តស្រះកែវ នៅច្រកទ្វារអន្តោប្រវេសន៍ ខេត្តស្រះកែវ បានត្រួតពិនិត្យលិខិតឆ្លងដែនបុរសជនជាតិម៉ុងហ្គោលី ដែលបង្ហាញឱ្យពួកគេបោះត្រាមុនធ្វើដំណើរមកប្រទេសកម្ពុជា។
ប៉ុន្តែម៉ាស៊ីន scan បានរកឃើញថា ជនជាតិម៉ុងហ្គោលីរូបនេះមានដីកាចាប់ខ្លួនចេញដោយតុលាការព្រហ្មទណ្ឌក្រុងបាងកកភាគខាងត្បូង ទើបលោក Pol Col Rung Thongmon អគ្គនាយកអន្តោប្រវេសន៍ខេត្តស្រះកែវ នាំកងកម្លាំងមកពិនិត្យ ក៏បានរកឃើញបុរសជនជាតិម៉ុងហ្គោលីម្នាក់ឈ្មោះថា Surengaraf Bayazaikan អាយុ ៣១ឆ្នាំ កាន់លិខិតឆ្លងដែនម៉ុងហ្គោលី មានដីកាចាប់ខ្លួនពីតុលាការព្រហ្មទណ្ឌក្រុងបាងកកភាគខាងត្បូង ពីបទល្មើស «លួចទ្រព្យសម្បត្តិ និងទទួលផលចោរកម្ម ថែមទាំងប្រើប្រាស់កាតអេឡិចត្រូនិករបស់អ្នកដទៃ» ដោយហេតុការណ៍នោះបានកើតឡើងនៅក្នុងស្ថានីយ៍ប៉ូលីសបុស្តិ៍ Thonglor ទីក្រុងបាងកក ប្រទេសថៃ។
គួរបញ្ជាក់អោយដឹងផងដែរថា លោក Surengaraf Bayazikahan បានសារភាពថា បុរសរូបនេះពិតជាជាបុគ្គលដែលមានដីកាចាប់ខ្លួនពិតប្រាកដមែន បន្ទាប់មកសមត្ថកិច្ចបានយកមកធ្វើកំណត់ហេតុប្រចាំថ្ងៃទុកជាភស្តុតាង មុនពេលឃាត់ខ្លួនជនជាតិម៉ុងហ្គោលី គឺលោក Surengaraf Bayazaikan ត្រូវបានបញ្ជូនទៅកាន់អ្នកស៊ើបអង្កេតនៅស្ថានីយ៍ប៉ូលីស Thonglor ទីក្រុងបាងកក ដើម្បីកាត់ទោសបន្ថែម យោងទៅតាមដីកាចាប់ខ្លួនដែលចេញដោយតុលាការឧក្រិដ្ឋកម្មភាគខាងត្បូងទីក្រុងបាងកក៕
អត្ថបទ៖ Bee
ប្រភព៖ Thairath