លោក Volodymyr Zelenskyy ថ្កោលទោសអ៊ីរ៉ង់ចំពោះការផ្គត់ផ្គង់យន្តហោះគ្មានមនុស្សបើកឱ្យរុស្ស៊ី
ប្រធានាធិបតីអ៊ុយក្រែនលោក Volodymyr Zelenskyy បានថ្កោលទោសអ៊ីរ៉ង់ ចំពោះការផ្គត់ផ្គង់យន្តហោះគ្មានមនុស្សបើកដល់រុស្ស៊ី ដោយសារវាកំពុងមានផលប៉ះពាល់យ៉ាងខ្លាំងដល់ជីវិតមនុស្ស។ នៅក្នុងបទសម្ភាសន៍ជាមួយប្រព័ន្ធផ្សព្វផ្សាយកាណាដាកាលពីថ្ងៃពុធ លោក Zelenskyy បាននិយាយថា៖«អ៊ីរ៉ង់ផ្គត់ផ្គង់ឱ្យពួកគេនូវយន្តហោះគ្មានមនុស្សបើក។ ផ្គត់ផ្គង់ការសម្លាប់ពួកគេ។ ការសម្លាប់ជនជាតិអ៊ុយក្រែន។ នេះជាអ្វីដែលពួកគេបានយល់ព្រម។ យល់ព្រមលើលុយ។ លុយបង្ហូរឈាមនេះដែលអ៊ីរ៉ង់រកបាន»។ លោកបាននិយាយថា យន្តហោះគ្មានមនុស្សបើកបានវាយប្រហារហេដ្ឋារចនាសម្ព័ន្ធ សាលារៀន និងសាកលវិទ្យាល័យរាប់រយកន្លែងនៅអ៊ុយក្រែន។
លោកប្រធានាធិបតីក៏បាននិយាយផងដែរថា ការវាយប្រហារលើប្រព័ន្ធថាមពលរបស់អ៊ុយក្រែន កំពុងគំរាមកំហែងដល់អាយុជីវិតរបស់មនុស្សដែលឈានចូលដល់រដូវរងា។ នៅសហរដ្ឋអាមេរិកឯណោះវិញ មន្ត្រីកំពូលរបស់អាមេរិកកំពុងចោទប្រកាន់អ៊ីរ៉ង់ថា បានជួយទាហានរុស្ស៊ីក្នុងការប្រតិបត្តិការយន្តហោះគ្មានមនុស្សបើក។ អ្នកសម្របសម្រួលក្រុមប្រឹក្សាសន្តិសុខជាតិសម្រាប់ទំនាក់ទំនងជាយុទ្ធសាស្ត្រ លោក John Kirby បាននិយាយថា អ៊ីរ៉ង់បានបញ្ជូនទាហានទៅគ្រីមៀ ដើម្បីបណ្តុះបណ្តាលទាហានរុស្ស៊ី។ ចំណែកសហភាពអឺរ៉ុប និងអង់គ្លេស ក៏កំពុងដាក់ទណ្ឌកម្មលើជនជាតិអ៊ីរ៉ង់មួយចំនួន សម្រាប់ផ្គត់ផ្គង់រុស្ស៊ីនូវយន្តហោះគ្មានមនុស្សបើកនេះ។ ទណ្ឌកម្មបានកំណត់គោលដៅអង្គភាពមួយ និងបុគ្គល ៣ នាក់។ ការពិន័យរួមមានការបង្កកទ្រព្យសម្បត្តិ និងការហាមឃាត់ការធ្វើដំណើរ។ យ៉ាងណា អ៊ីរ៉ង់បានបដិសេធការផ្គត់ផ្គង់យន្តហោះគ្មានមនុស្សបើកដល់ក្រុងម៉ូស្គូ៕
អត្ថបទ៖ លីដា
ប្រភព៖ NHK