បុគ្គលិក Twitter បានព្រមានថា ការបញ្ឈប់បុគ្គលិកតាមគម្រោងរបស់លោក Elon Musk នឹងក្លាយជារឿងដែលខ្ជីខ្ជាបំផុត
រយៈពេលប៉ុន្មានថ្ងៃ នៅមុនពេលកិច្ចព្រមព្រៀងរបស់លោក Elon Musk ដើម្បីទទួលបាន Twitter នឹងឈានចូលដល់ទីបញ្ចប់ បុគ្គលិករបស់ក្រុមហ៊ុនបណ្ដាញសង្គមមួយនេះ កំពុងព្រមានថា ការកាត់បន្ថយបុគ្គលិកនឹងក្លាយជារឿងដែលខ្ជីខ្ជាបំផុត នេះបើតាមសំបុត្របើកចំហរមួយពីបុគ្គលិក Twitter ដោយមិនបានបញ្ជាក់ចំនួន ដែលផ្ញើទៅកាន់ក្រុមប្រឹក្សាភិបាលរបស់លោក Musk និង Twitter ។ លិខិតនេះបានកើតឡើងដោយផ្អែកលើរបាយការណ៍ពីកាសែត The Washington Post ដែលថា លោក Musk ចង់កាត់បន្ថយបុគ្គលិកចំនួន ៧៥% នៅក្នុងចំណោមបុគ្គលិកសរុបប្រមាណ ៧៥០០ នាក់ របស់ក្រុមហ៊ុន Twitter ។
លិខិតនោះបាននិយាយថា៖«ផែនការរបស់ Elon Musk ក្នុងការបញ្ឈប់បុគ្គលិក ៧៥% របស់ Twitter នឹងធ្វើឱ្យប៉ះពាល់ដល់សមត្ថភាពរបស់ Twitter ក្នុងការបម្រើការសន្ទនាជាសាធារណៈ។ ការគំរាមកំហែងមួយនេះគឺជាភាពខ្ជីខ្ជា ធ្វើឱ្យខូចទំនុកចិត្តរបស់អ្នកប្រើប្រាស់ និងអតិថិជនរបស់យើងចំពោះវេទិការបស់យើង ហើយជាទង្វើប្រកបដោយតម្លាភាពនៃការបំភិតបំភ័យបុគ្គលិក។ យើងមិនអាចធ្វើការងាររបស់យើងក្នុងបរិយាកាសនៃការបំពាន និងការគំរាមកំហែងឥតឈប់ឈរនោះទេ»។
លិខិតនេះក៏រួមបញ្ចូលផងដែរនូវបញ្ជីនៃតម្រូវការសម្រាប់ «ភាពជាអ្នកដឹកនាំបច្ចុប្បន្ន និងអនាគត» របស់ក្រុមហ៊ុន ដែលបន្ថែមពីលើ «គោលការណ៍ផ្តាច់មុខដោយយុត្តិធម៌សម្រាប់បុគ្គលិកទាំងអស់»។ ពោលគឺ ម្ចាស់សំបុត្រចង់ឱ្យលោក Musk រក្សាអត្ថប្រយោជន៍បុគ្គលិកដែលមានស្រាប់ រួមទាំងការងារពីចម្ងាយផងដែរ។ រំលឹកដែរថា លោក Musk ក៏ធ្លាប់បានរិះគន់ការងារពីចម្ងាយផងដែរ ហើយបានស្នើឱ្យបុគ្គលិក Twitter ភាគច្រើន គួរតែត្រឡប់ទៅធ្វើការនៅការិយាល័យវិញ។ គេមិនដឹងថា តើមានបុគ្គលិកប៉ុន្មាននាក់បានចុះហត្ថលេខាលើលិខិតនោះមកទល់ពេលនេះ។ ប៉ុន្តែវានៅតែជាសញ្ញាមួយផ្សេងទៀត ដែលបង្ហាញពីភាពរញ៉េរញ៉ៃដែលអាចទៅរួចសម្រាប់បុគ្គលិក Twitter នៅក្រោមការដឹកនាំរបស់លោក Musk ៕
អត្ថបទ៖ លីដា
ប្រភព៖ Engadget