មជ្ឈមណ្ឌលគ្រប់គ្រង និងបង្ការជំងឺរបស់ចិនបាននិយាយថា ការឆ្លងថ្មីនៃករណីជំងឺ COVID-19 ប្រចាំថ្ងៃរបស់ចិន បានកើនឡើងដល់កំពូលជាង ៧ លាននាក់ក្នុងមួយថ្ងៃ នៅអំឡុងថ្ងៃទី ២២ ខែធ្នូ ខណៈដែលចំនួនស្លាប់បានឈានដល់កម្រិតកំពូលប្រចាំថ្ងៃជាង ៤,០០០ នាក់ នៅថ្ងៃទី ៤ ខែមករា។ តួលេខដែលបានចេញផ្សាយនៅលើគេហទំព័ររបស់ CDC បានកើតឡើង បន្ទាប់ពីអ្នកវិទ្យាសាស្ត្ររដ្ឋាភិបាលដ៏លេចធ្លោម្នាក់ បាននិយាយកាលពីចុងសប្តាហ៍ថា ៨០% នៃចំនួនប្រជាជន ១.៤ ពាន់លាននាក់របស់ចិន បានឆ្លងជំងឺ COVID-19 រួចទៅហើយ ដែលធ្វើឱ្យមានលទ្ធភាពនៃការរីករាលដាលនៃជំងឺ COVID-19 ដ៏ធំមួយ ក្នុងរយៈពេលពីរ ឬបីខែខាងមុខ។

ខ្លួនបាននិយាយថា៖«នៅអំឡុងថ្ងៃទី២២ ខែធ្នូ ឆ្នាំ២០២២ ចំនួនអ្នកឆ្លងជំងឺ និងចំនួនអ្នកពិគ្រោះជំងឺគ្រុនក្តៅ បានឈានដល់កម្រិតកំពូល ដោយចំនួននៃការឆ្លងថ្មីមានលើសពី ៧ លាននាក់ក្នុងមួយថ្ងៃ និងចំនួននៃការពិគ្រោះជាមួយអ្នកជំងឺគ្រុនក្តៅប្រចាំថ្ងៃឈានដល់កម្រិតខ្ពស់បំផុតដល់ ២.៨៦៧ លាននាក់»។

យ៉ាងណា មន្ត្រីគណៈកម្មការសុខភាពជាតិបាននិយាយកាលពីសប្តាហ៍មុនថា ប្រទេសចិនបានឆ្លងផុតពីកម្រិតកំពូលនៃអ្នកជំងឺ COVID-19 នៅក្នុងគ្លីនិក បន្ទប់សង្គ្រោះបន្ទាន់ និងមានស្ថានភាពធ្ងន់ធ្ងរ។ យោងតាមទិន្នន័យរបស់រដ្ឋាភិបាលបានឱ្យដឹងថា មនុស្សជិត ៦០,០០០ នាក់ ដែលមានជំងឺ COVID-19 បានស្លាប់នៅក្នុងមន្ទីរពេទ្យគិតត្រឹមថ្ងៃទី១២ ខែមករា ប្រហែលមួយខែបន្ទាប់ពីប្រទេសចិន បានរុះរើភ្លាមៗនូវគោលនយោបាយ zero-COVID ដ៏តឹងរឹងរបស់ខ្លួន នេះបើយោងតាមទិន្នន័យរបស់រដ្ឋាភិបាល។ ប៉ុន្តែអ្នកជំនាញមួយចំនួនបាននិយាយថា តួលេខនេះប្រហែលជារាប់មិនអស់ពីផលប៉ះពាល់ទាំងស្រុងនោះទេ ព្រោះវាមិនរាប់បញ្ចូលអ្នកដែលស្លាប់នៅផ្ទះ និងដោយសារតែគ្រូពេទ្យជាច្រើនបាននិយាយថា ពួកគេមិនចង់និយាយថា COVID-19 ជាមូលហេតុនៃការស្លាប់ទាំងនោះ៕

អត្ថបទ៖ លីដា
ប្រភព៖ Channel News Asia