អ្នក​ប្រដាល់​គុន​ខ្មែរ ព្រំ សំណាង បាននាំមកនូវភាពភ្ញាក់ផ្អើលសាជាថ្មីម្ដងទៀត បន្ទាប់ពីបាន​ផ្ដួល​អ្នក​ប្រដាល់​ជើង​ខ្លាំងរបស់​រុ​ស្ស៊ី Firdavszhon Naiimov ឱ្យ​សន្លប់លើ​សង្វៀន Thai Fight ប្រទេស​ថៃ កាលពី​ល្ងាច​ថ្ងៃអាទិត្យ ​ទី​២៦ ខែកុម្ភៈ ឆ្នាំ​២០២៣។ វាគឺជាការប្រកួតលើកទី២ ដែលកីឡាករ ព្រំ សំណាង បានធ្វើឱ្យដៃគូប្រកួតសន្លប់នៅលើ​សង្វៀន។ ក្រោយជោគជ័យនេះ លោកឧកញ៉ា ស្រី ចាន់ថន បានប្រកាសភ្លាមៗថា លោកនឹងឧបត្ថម្ភទឹកប្រាក់ ៥លានរៀលជូនគាត់ ហើយនៅថ្ងៃនេះផ្ទាល់ លោកក៏បានជួប និងប្រគល់ប្រាក់ជូន ព្រំ សំណាង ដោយផ្ទាល់។

នៅលើបណ្ដាញសង្គមរបស់លោកឧកញ៉ា ស្រី ចាន់ថន ផ្ទាល់គាត់បានសរសេរថា៖ «ថ្ងៃនេះកីឡាករ ព្រំ សំណាង បានមកទទួលប្រាក់រង្វាន់(៥លានរៀល)ពីខ្ញុំបាទហើយ។ស្របពេលជាមួយគ្នា ខ្ញុំនឹងបើកហាងកាត់សក់មួយកន្លែងជូនប្អូន ព្រំ សំណាងក្នុងពេលឆាប់ៗនេះ ព្រោះខ្ញុំចង់ឲ្យការជួយរបស់ខ្ញុំគឺជាការជួយកីឡាកររបស់យើងឲ្យមានជីវភាពល្អប្រសើរពេញមួយជីវិត។ ខ្ញុំពិតជាមានមោទនភាពយ៉ាងខ្លាំងក្រៃលែងដែលកីឡាករខ្មែរយើងអាចឈានមកដល់កម្រិតមួយនេះ។ ខ្ញុំសង្ឃឹមយ៉ាងមុតមាំថា កីឡាករគុនខ្មែររបស់យើងនឹងអាចយកជ័យជំនៈបានជាបន្តបន្ទាប់នៅពេលអនាគត។ ❤️🇰🇭💐 ❤️🇰🇭💐»៕