មន្ត្រីពេទ្យសត្វពិភពលោក និងសហរដ្ឋអាមេរិកបាននិយាយថា វ៉ាក់សាំងប្រឆាំងនឹងជំងឺប៉េស្តជ្រូកអាហ្រ្វិក (African swine fever) ដែលកំពុងត្រូវបានធ្វើតេស្តនៅក្នុងប្រទេសវៀតណាម បានឈានជិតដល់ការអនុម័តជាផ្លូវការហើយ នៅក្នុងអ្វីដែលនឹងក្លាយជារបកគំហើញដ៏សំខាន់បំផុតមួយ ដើម្បីដោះស្រាយជំងឺសត្វដ៏សាហាវ ដែលតែងតែបំផ្លាញកសិដ្ឋានចិញ្ចឹមជ្រូកទូទាំងពិភពលោកមួយនេះ។ វ៉ាក់សាំងទី១ មានឈ្មោះថា NAVET-ASFVAC ដែលជាការសហការគ្នាបង្កើតឡើងដោយក្រុមហ៊ុនវៀតណាម NAVETCO និងក្រសួងកសិកម្មសហរដ្ឋអាមេរិក (USDA)។ វ៉ាក់សាំងទី២ មានឈ្មោះថា AVAC ASF LIVE ដែលត្រូវបានរកឃើញដោយអ្នកស្រាវជ្រាវអាមេរិក និងធ្វើពាណិជ្ជកម្មដោយក្រុមហ៊ុនវៀតណាម AVAC។

វ៉ាក់សាំងទាំង ២ ត្រូវបានសាកល្បងនៅក្នុងប្រទេសវៀតណាម ដោយសារតែជំងឺប៉េស្តជ្រូកអាហ្រ្វិក មិនសូវមានការផ្ទុះឡើងនៅសហរដ្ឋអាមេរិកនោះទេ ស្របពេលដែលការធ្វើតេស្ដនៅប្រទេសចិន ក៏មានភាពលំបាកដោយសារទិន្នន័យមានកម្រិត។ប្រទេសវៀតណាមបានអនុម័តឱ្យមានការសាកល្បងវ៉ាក់សាំង NAVET-ASFVAC និង AVAC ASF LIVE រួចមកហើយ សម្រាប់ជំហានបន្ទាប់ គឺការអនុម័តពេញលេញសម្រាប់ការចែកចាយទូទាំងប្រទេស និងលទ្ធភាពនៃការលក់ទៅកាន់ពិភពលោក។

ជម្រាបដែរថា ជំងឺប៉េស្តជ្រូកអាហ្រ្វិក បានរំខានដល់ទីផ្សារសាច់ជ្រូកពិភពលោកដែលមានតម្លៃ ២៥០ លានដុល្លារ អស់រយៈពេលជាច្រើនឆ្នាំមកហើយ។ ជាក់ស្ដែងកាលពីអំឡុងឆ្នាំ២០១៨-១៩ ជ្រូកកសិដ្ឋានប្រហែលពាក់កណ្ដាលនៅក្នុងប្រទេសចិន ដែលជាអ្នកផលិតធំបំផុតរបស់ពិភពលោក ត្រូវបានស្លាប់ ដែលបណ្តាលឱ្យមានការខាតបង់ប្រមាណជាង ១០០ ពាន់លានដុល្លារអាមេរិក៕

អត្ថបទ៖ លីដា
ប្រភព៖ Channel News Asia

លោក Siti Nurbaya Bakar រដ្ឋមន្ត្រីក្រសួងបរិស្ថាន និងព្រៃឈើរបស់ប្រទេសឥណ្ឌូណេស៊ី កាលពីថ្ងៃចន្ទ ទី០៥ ខែមិថុនាបាននិយាយថា ប្រទេសឥណ្ឌូនេស៊ីនឹងចាប់ផ្តើមដាក់បម្រាមលើផលិតផលផ្លាស្ទិកប្រើតែមួយដង (single-use) នៅចុងឆ្នាំ២០២៩។ នៅពេលនោះ ក្រុមហ៊ុនផលិតក៏ត្រូវមានកាតព្វកិច្ចកាត់បន្ថយការប្រើប្រាស់វេចខ្ចប់ប្លាស្ទិកចំនួន ៣០% ផងដែរ។ លោក Siti Nurbaya បាននិយាយថា ការហាមប្រាមនឹងរួមបញ្ចូល ថង់ផ្លាស្ទិកដែលប្រើតែមួយដង បំពង់បឺតផ្លាស្ទិច និងប្រដាប់កាត់ប្លាស្ទិក ខណៈដែលការប្រើប្រាស់ប្រអប់ស្នោ styrofoams វេចខ្ចប់អាហារក៏នឹងត្រូវហាមឃាត់ផងដែរ។

រដ្ឋមន្ត្រីរូបនេះ បាននិយាយថា៖«នេះគឺជាមធ្យោបាយដោះស្រាយជាមួយកាកសំណល់វេចខ្ចប់ដែលពិបាកក្នុងការប្រមូល មិនមានតម្លៃសន្សំសំចៃ ពិបាកក្នុងការកែច្នៃឡើងវិញ និងមានសក្តានុពលក្នុងការបំពុលបរិស្ថាន»។ ជម្រាបដែរថា ការសិក្សា និងរបាយការណ៍ជាច្រើន បានដាក់ឈ្មោះប្រទេសឥណ្ឌូណេស៊ីថា ជាប្រទេសផលិតកាកសំណល់ប្លាស្ទិកកំពូលមួយក្នុងពិភពលោក។ កាលពីឆ្នាំមុន ប្រទេសដែលមានប្រជាជនចំនួន ២៧០ លាននាក់ បានផលិតកាកសំណល់ប្លាស្ទិកចំនួន ១២.៦ លានតោន នេះបើយោងតាមទិន្នន័យពីក្រសួងបរិស្ថានរបស់ប្រទេសឥណ្ឌូនេស៊ី៕

អត្ថបទ៖ លីដា
ប្រភព៖ Channel News Asia

អ៊ុយក្រែន៖ ពលរដ្ឋប្រមាណជា ៤២,០០០នាក់កំពុងមានហានិភ័យខ្ពស់ក្នុងការរងគ្រោះដោយទឹកជំនន់ ក្រោយទំនប់ទឹកដ៏ធំមួយនៅក្នុងប្រទេសអ៊ុយក្រែនត្រូវបានបំផ្លាញ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃពុធ ទី៧ ខែមិថុនានេះ។ គួររម្លឹកថា ទំនប់ទឹកខាងលើនេះមានឈ្មោះថា  Kakhovka មានទីតាំងស្ថិតនៅលើទន្លេ Dnipro ក្នុងតំបន់ Kherson ភាគខាងត្បូង និងត្រូវបានបំផ្លាញដោយការបំផ្ទុះមួយកាលពីថ្ងៃម្សិលមិញនេះ។

ប្រភពខាងលើបានបន្តថា ពលរដ្ឋដែលអាចប្រឈមនឹងគ្រោះថ្នាក់ដោយទឹកជំនន់នោះគឺជាពលរដ្ឋមួយចំនួនដែលកំពុងរស់នៅក្នុងទឹកដីរុស្ស៊ី និងពលរដ្ឋមួយចំនួនដែលកំពុងរស់នៅក្នុងតំបន់ដែលស្ថិតក្រោមការគ្រប់គ្រងរបស់អ៊ុយក្រែនផងដែរ។ បើតាមអាជ្ញាធរអ៊ុយក្រែនបានបញ្ជាក់ថា ភ្លាមៗក្រោយមានការបំផ្លាញទំនប់ទឹកខាងលើនេះគឺមានពលរដ្ឋជាច្រើននាក់បានសម្រេចធ្វើការជម្លៀសខ្លួនចេញពីផ្ទះសម្បែងរបស់ពួកគេរួចហើយ តែយ៉ាងណាក្តីទំនប់ទឹកខាងលើនេះគឺជាកន្លែងស្តុកទឹកក្នុងបរិមាណយ៉ាងច្រើន​ ហើយបើក្នុងករណីដែលទឹកនៅតែបន្តធ្លាយចេញពីទំនប់មួយនេះយ៉ាងឆាប់រហ័សនោះគឺប្រាកដណាស់ថាវានឹងបង្កើតឲ្យមានទឹកជំនន់ជន់លិចសហគមន៍រស់នៅរបស់ពលរដ្ឋជាច្រើនកន្លែងតែម្តង៕

អត្ថបទ៖ ភក្តី

ប្រភព៖ Channel News Asia