ការសិក្សាមួយបានបង្ហាញថា នៅក្នុងឆ្នាំ ២០២២កន្លងទៅនេះមានប្រទេសត្រឹមតែ ៦ប៉ុណ្ណោះដែលមានខ្យល់បរិសុទ្ធស្របតាមស្តង់ដារសុវត្ថិភាព ឬគុណភាពខ្យល់ស្ថិតនៅក្រោមកម្រិត PM2,5។ យោងតាមការចុះផ្សាយរបស់បណ្តាញសារព័ត៌មាន CNN បានបញ្ជាក់ថា ការសិក្សាមួយនេះត្រូវបានធ្វើឡើងដោយក្រុមហ៊ុន IQAir ដែលបានធ្វើការត្រួតពិនិត្យនិងតាមដានគុណភាពខ្យល់នៅក្នុងប្រទេសចំនួន ១៣១ នៅជុំវិញពិភពលោកយ៉ាងយកចិត្តទុកដាក់បំផុត។

នៅក្នុងរបាយការណ៍របស់ក្រុមហ៊ុន IQAir បានបង្ហាញថា ប្រទេសទាំង ៦ ដែលមានគុណភាពខ្យល់ល្អប្រសើរស្របតាមស្តង់ដារសុវត្ថិភាពនោះមានដូចជា ប្រទេសអូស្ត្រាលី ប្រទេសអេស្តូនី ប្រទេសហ្វាំងឡង់ ប្រទេសហ្គ្រេណាដា ប្រទេសអ៉ីស្លង់ និងប្រទេសនូវែលសេឡង់។ ក្រៅពីប្រទេសទាំង ៦ នេះគឺនៅមានដែនដីស្វយ័តចំនួន ៧កន្លែងផ្សេងទៀតនៅក្នុងតំបន់ប៉ាស៊ីហ្វិក និងការាបៀន ដែលត្រូវបានគេរកឃើញថា មានគុណភាពខ្យល់ល្អប្រសើរផងដែរ ដោយតំបន់ទាំងនោះមានដូចជាកោះហ្គាំនិងតំបន់ព័រតូរីកូជាដើម៕

អត្ថបទ៖ ភក្តី

ប្រភព៖ CNN