រុស្ស៊ី៖ លោកប្រធានាធិបតី វ៉្លាឌីមៀរ ពូទីន បានបញ្ជាក់ថា​ រុស្ស៊ីបានត្រៀមខ្លួនរួចរាល់ហើយក្នុងការពិភាក្សាយ៉ាងទូលំទូលាយជាមួយសមភាគីចិនជុំវិញសំណើសុំបិទបញ្ចប់សង្គ្រាមនៅលើទឹកដីអ៊ុយក្រែន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃអង្គារ ទី២១ ខែមីនានេះ។ គួរកត់សម្គាល់ថា លោកប្រធានាធិបតីចិន ស៊ី ជីនពីង បានអញ្ជើញទៅដល់ប្រទេសរុស្ស៊ីតាំងពីថ្ងៃចន្ទម្សិលមិញម្ល៉េះ ខណៈដំណើរទស្សនកិច្ចរបស់ប្រមុខដឹកនាំចិននៅពេលនេះនឹងត្រូវមានរយៈពេលចំនួ​ន ៣ថ្ងៃ។

តាមគម្រោងគឺលោកប្រធានាធិបតីចិន ស៊ី ជីនពីង នឹងត្រូវជួបផ្ទាល់មួយលោកប្រធានាធិបតីរុស្ស៊ី វ្ល៉ាឌីមៀរ ពូទីន នៅថ្ងៃអង្គារនេះនៅឯវិមានក្រឹមឡាំង ក្នុងទីក្រុងមូស្គូ។ គួរកត់សម្គាល់ថា នេះគឺជាលើកទី១ ហើយដែលលោក ស៊ី ជីនពីង បានអញ្ជើញធ្វើទស្សនកិច្ចទៅកាន់ប្រទេសរុស្ស៊ី បើរាប់ចាប់តាំងពីប្រទេសរុស្ស៊ីផ្តើមធ្វើការឈ្លានពានចូលក្នុងទឹកដីអ៊ុយក្រែនមក ហើយដំណើរទស្សនកិច្ចនេះត្រូវបានគេមើលឃើញថា​ គឺជាចេតនាដែលចិនចង់បង្ហាញការគាំទ្រដល់ប្រទេសរុស្ស៊ី ខណៈប្រទេសជាច្រើននៅជុំវិញពិភពកំពុងធ្វើការថ្កោលទោសរុស្ស៊ី។ ជុំវិញដំណើរទស្សនកិច្ចដ៏កម្រនេះ សហរដ្ឋអាមេរិកបានព្រមានថា សុំកុំចាញ់បោកចិនឲ្យសោះ ដ្បិតនៅពីក្រោយការធ្វើទស្សនកិច្ចនេះគឺចិនបាននាំអាវុធជាច្រើនទៅកាន់ប្រទេសរុស្សី៕

អត្ថបទ៖ ភក្តី

ប្រភព៖ Channel News Asia