អាមេរិក៖ ក្រុមហ៊ុនលក់ទំនិញតាមប្រព័ន្ធ Online ដ៏ធំនៅលើពិភពលោកគឺក្រុមហ៊ុន Amazon បានសម្រេចកាត់បន្ថយបុគ្គលិកចំនួន ៩,០០០នាក់​បន្ថែមទៀត នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time នៅព្រឹកថ្ងៃអង្គារ ទី២១ ខែមីនានេះ។ គួររម្លឹកជូនថា​ ការសម្រេចកាត់បន្ថយបុគ្គលិកក្នុងចំនួនដ៏ច្រើននៅពេលនេះ គឺត្រូវបានធ្វើឡើងបន្ទាប់ពីក្រុមហ៊ុនយក្សមួយនេះធ្លាប់បានកាត់បន្ថយបុគ្គលិកក្នុងចំនួនដ៏ច្រើនបំផុតមិនធ្លាប់មានក្នុងប្រវត្តិរបស់ក្រុមហ៊ុនម្តងរួចហើយកាលពីពេលថ្មីៗនេះ ពោលគឺកាត់បន្ថយបុគ្គលិករហូតដល់ ១៨,០០០នាក់ក្នុងពេលដំណាលគ្នា។

បើតាមលោក Andy Jassy ដែលជានាយកប្រតិបត្តិរបស់ក្រុមហ៊ុន Amazon បានបញ្ជាក់ថា ការជម្រុះចោលបុគ្គលិកទាំង ៩,០០០នាក់នេះនឹងត្រូវធ្វើឡើងនៅក្នុងរយៈពេល ២-៣ សប្តាហ៍ទៀត ខណៈផ្នែកដែលនឹងត្រូវគេកាត់បន្ថយបុគ្គលិកនោះមានដូចជា ផ្នែកសេវាកម្មគេហទំព័រ (Amazon Web Services) ផ្នែកគ្រប់គ្រងធនធានមនុស្ស ផ្នែកពាណិជ្ជកម្ម និងផ្នែកផ្តល់សេវាកម្ម Live Streaming ជាដើម។ លោកនាយកប្រតិបត្តិរូបនេះបានបញ្ជាក់ថា ការសម្រេចកាត់បន្ថយបុគ្គលិកក្នុងចំនួនដ៏ច្រើននេះគឺត្រូវបានធ្វើឡើងឲ្យក្រោមហេតុផលថា ដើម្បីជួយដោះស្រាយវិបត្តិហិរញ្ញវត្ថុរបស់ក្រុមហ៊ុន ដែលកំពុងរងផលប៉ះពាល់យ៉ាងខ្លាំងពីវិបត្តិសេដ្ឋកិច្ចសកលនៅលើពិភពលោកនាពេលបច្ចុប្បន្ននេះ៕

អត្ថបទ៖ ភក្តី

ប្រភព៖ The Strait Time