ប្រទេសកូរ៉េខាងជើងបាននិយាយថា ខ្លួនបានធ្វើសមយុទ្ធវាយប្រហារនុយក្លេអ៊ែរយុទ្ធសាស្ត្រ និងបានបាញ់មីស៊ីលផ្លោងចំនួន ២ កាលពីថ្ងៃពុធ ដើម្បីឆ្លើយតបទៅនឹងសមយុទ្ធយោធារួមគ្នាដែលធ្វើឡើងដោយសហរដ្ឋអាមេរិក និងកូរ៉េខាងត្បូង។ អគ្គ​សេនាធិការ​នៃ​កងទ័ព​ប្រជាជន​កូរ៉េ​បាន​និយាយ​ថា ខ្លួន​បាន​បាញ់​មីស៊ីល​ទៅ​ទិស​ឦសាន​ពី​អាកាសយានដ្ឋាន​អន្តរជាតិ​ក្រុង​ព្យុងយ៉ាង ហើយការ​ប្រកាស​នេះ​ត្រូវ​បាន​ធ្វើ​ឡើង​ដោយ​កាសែត Rodong Sinmun គណបក្ស​កាន់​អំណាច​នៅ​ថ្ងៃ​ព្រហស្បតិ៍នេះ។

កូរ៉េខាងជើងបាននិយាយថា សមយុទ្ធវាយប្រហារនុយក្លេអ៊ែរយុទ្ធសាស្ត្រខ្លួន បានបំផ្លិចបំផ្លាញមជ្ឈមណ្ឌលបញ្ជាការសំខាន់ៗ និងទីលានអាកាសប្រតិបត្តិការរបស់កូរ៉េខាងត្បូង។ ពួកគេក៏បាននិយាយថា មីស៊ីលត្រូវបានបំផ្ទុះនៅរយៈកម្ពស់ ៤០០ ម៉ែត្រពីលើកោះគោលដៅ។ យោធាកូរ៉េខាងជើងបាននិយាយថា សមយុទ្ធកាលពីថ្ងៃពុធគឺដើម្បីឆ្លើយតបទៅនឹងសមយុទ្ធរួមគ្នាដោយសហរដ្ឋអាមេរិក និងកូរ៉េខាងត្បូង ដែលពាក់ព័ន្ធនឹងយន្តហោះទម្លាក់គ្រាប់បែក B-1B របស់អាមេរិកនៅថ្ងៃតែមួយ។ ដូច្នេះខ្លួននឹងមិនអង្គុយមើល «សកម្មភាពព្រហើន» របស់យោធាអាមេរិក និងកូរ៉េខាងត្បូងឡើយ៕

អត្ថបទ៖ លីដា
ប្រភព៖ NHK