យោងតាមរបាយការណ៍របស់សារព័ត៌មាន CNN បានឱ្យដឹងថា ទីភ្នាក់ងារអវកាសអាមេរិក ណាសា (NASA) កំពុងធ្វើការសិក្សាលើ «យុទ្ធសាស្ត្រល្បឿនលឿន» ដែលអាចកាត់បន្ថយរយៈពេលនៃការហោះហើរ ពីទីក្រុងញូវយ៉ករបស់អាមេរិក ទៅកាន់ទីក្រុងឡុងដ៍របស់អង់គ្លេស មកត្រឹមរយៈពេល ៩០ នាទីប៉ុណ្ណោះ។ បច្ចុប្បន្នយន្តហោះដឹកអ្នកដំណើរទូទៅ គឺអាចជិះក្នុងល្បឿន ៦០០ ម៉ាយ/ម៉ោង ប៉ុន្តែណាសាកំពុងស្វែងរកលទ្ធភាពនៃការរចនាយន្តហោះ supersonic ដែលអាចដំណើរការបានក្នុងចន្លោះល្បឿន ១,៥៣៥ ម៉ាយ/ម៉ោង (Mach2) ទៅដល់ ៣,០៤៥ ម៉ាយ/ម៉ោង (Mach4)។

មជ្ឈមណ្ឌលស្រាវជ្រាវ Glenn របស់អង្គការណាសា បាននិយាយថា បច្ចុប្បន្ននេះក្រុមស្រាវជ្រាវបានរកឃើញផ្លូវហោះហើរសក្ដានុពលចំនួន ៥០ សម្រាប់យន្តហោះល្បឿនលឿនជាងសំឡេង supersonic។ ផ្លូវទាំងនោះសុទ្ធតែជាផ្លូវឆ្លងកាត់មហាសមុទ្រ ដោយសារតែប្រទេសជាច្រើនរួមទាំងសហរដ្ឋអាមេរិក ដាក់ការហាមឃាត់ការហោះហើរយន្តហោះ supersonic ឆ្លងកាត់ផ្លូវលើដី ព្រោះតែសំឡេងរំខានរបស់វា។ ដូច្នេះ អង្គការណាសា ក៏កំពុងព្យាយាមធ្វើឱ្យច្បាប់នៃហោះហើរយន្តហោះ supersonic នៅលើដីត្រូវបានផ្លាស់ប្តូរផងដែរ។

ក្រោមបេសកកម្ម Quesst ណាសាកំពុងអភិវឌ្ឍយន្តហោះ X-59 ដែលមានបច្ចេកវិទ្យាកាត់បន្ថយសម្លេងរំខានខ្លាំង ដើម្បីឱ្យយន្តហោះលឿនជាងសំឡេងមួយនេះកាន់តែប្រសើរជាងមុន។ ក្រុមស្រាវជ្រាវក៏នឹងចែកចេញជា ២ផ្នែក ដែលមានមួយនឹងត្រូវដឹកនាំដោយក្រុមហ៊ុន Boeing ហើយមួយទៀត ដោយក្រុមហ៊ុន Northrop Grumman Aeronautics Systems។ នៅក្នុងដំណាក់កាលថ្មីនេះ អង្គការណាសា នឹងពិចារណាខ្លាំងបំផុតលើបញ្ហា «សុវត្ថិភាព ប្រសិទ្ធភាព សេដ្ឋកិច្ច និងសង្គម» ហើយការសាកល្បងដំបូងនឹងចាប់ផ្ដើមនៅឆ្នាំក្រោយនេះ៕

អត្ថបទ៖ លីដា
ប្រភព៖ CNN