ការបោះជំហានប្រឡូកសិល្បៈសារជាថ្មី ក្រោយបាត់មុខ ៣ឆ្នាំ Step បានបង្ហាញមុខក្នុងនាមជាតារាចម្រៀង ក្នុងផលិតកម្មថ្មី “GenMusix” ជាមួយនឹងបទចម្រៀង MV ដ៏មានគុណភាព «កាឡកណ្ណី» ធ្វើឱ្យទស្សនិកជនជាអ្នកគាំទ្រតារាចម្រៀងរូបនេះភ្ញាក់ផ្អើលជាខ្លាំង តាមរយៈផ្ទាំងទស្សនីយភាពដ៏ប្លែកភ្នែក។

ក្នុង MV បទចម្រៀងនេះ តារាចម្រៀងប្រុសរូបសង្ហា Step បានបង្ហាញឈុតឆាកអស្ចារ្យជាច្រើន ដែលមើលទៅប្រៀបដូចជាការសម្ដែងក្នុងភាពយន្តមួយ ដែលមានទាំងឈុតឆាកបែបស៊ិចស៊ី ឈុតបង្ហាញក្បាច់ដាវ ព្រមទាំងឈុតឆាកពិសេសៗជាច្រើនទៀត។ អ្វីដែលធ្វើឱ្យអ្នកទស្សនាចំហមាត់ មើលមិនហ៊ានព្រិចភ្នែកនោះ គឺឈុតបញ្ចេញសាច់ដុំកង់ៗ ហាប់ណែន មូលក្លំ ដ៏សង្ហារបស់ Step តែម្ដង ដោយកន្លងមកគេមិនដែលឃើញតារាចម្រៀងរូបនេះ សម្ដែងក្នុងឈុតឆាកដោះអាវឡើយ ពិសេសឈុតញ៉ាំស៊ូស៊ីលើខ្លួនបែបជប៉ុននេះតែម្ដង។
ទម្រាំដាច់ចិត្តវិលត្រឡប់មកពិភពសិល្បៈចម្រៀងម្ដងទៀត Step បានគិតគូរយ៉ាងល្អិតល្អន់បំផុត ដើម្បីធ្វើយ៉ាងណាឱ្យការបង្ហាញខ្លួនរបស់គេមានអ្វីដែលថ្មីមកបង្ហាញទស្សនិកជន ពិសេសអ្នកគាំទ្ររបស់ខ្លួន។ តាមរយៈវីដេអូមួយ និយាយពីការផ្លាស់ប្ដូររូបរាង Step បាននិយាយថា៖ «ខ្ញុំគួរតែមានអ្វីថ្មី សម្រាប់អ្នកគាំទ្រ គួរតែឃើញអ្វីថ្មី និងគួរតែឃើញ Step ថ្មី អ្វីដែលមិនធ្លាប់ឃើញ Step ពីមុន»។ Step ប្រាប់ថា បទចម្រៀង«កាឡកណ្ណី» គឺជាបទទី១ ក្នុងរយៈពេល ៣ ឆ្នាំ ដែលមិនបានចេញបទចម្រៀងថ្មីទាល់តែសោះ។

យ៉ាងណាមិញ ដើម្បីថតបទចម្រៀងនេះបាន ឧបសគ្គដ៏ធំមួយនោះ គឺការផ្លាស់ប្ដូររូបរាងថ្មី។ ក្រោយមានការពិភាក្សាយ៉ាងល្អិតល្អន់ Step បានចាប់ផ្ដើមហាត់ប្រាណ ដោយចំណាយពេលរហូតដល់ ៩ខែ ទើបអាចទទួលបានលទ្ធផលដូចដែលអ្នកទាំងអស់គ្នាបានឃើញក្នុងវីដេអូចម្រៀង។ រូបគេក៏បានប្រាប់ពីគន្លឹះសំខាន់ៗ ដើម្បីអាចទទួលបានលទ្ធផលល្អ គឺបន្ទាប់ពីការហាត់ប្រាណ របបអាហារក៏សំខាន់ដែរ ត្រូវធ្វើតមអាហារ ហើយហាត់មួយសប្ដាហ៍ ៥ ទៅ ៦ ថ្ងៃ ហើយមួយថ្ងៃហាត់យ៉ាងតិច ២ម៉ោង។

ការហាត់ទៀតសោត គឺត្រូវដាក់ Schedule ថ្ងៃណាហាត់ស្មា ហាត់ទ្រូង ហាត់ខ្នង ហាត់ជើងជាដើម។ ដំបូងៗ Step ថាពិតជាពិបាកតែការតាំងចិត្ត តស៊ូ រហូតក្លាយជាទម្លាប់។ ក្រោយទទួលបានលទ្ធផលបន្ទាប់ពីចំណាយពេល ៩ខែ ទើបដំណើរការថតបទចម្រៀងថ្មីរបស់ខ្លួនបានចាប់ផ្ដើម និងយកមកបង្ហាញទស្សនិកជនជាផ្លូវការ នៅថ្ងៃទី ១៩ ខែកញ្ញា ឆ្នាំ ២០២៣កន្លងទៅនេះ។
Step ព្រមទាំងតារាចម្រៀងរួមទ្រនំ SK នឹងមានបទចម្រៀងថ្មីៗជាបន្តទៀត ដើម្បីពញ្ញាក់អារម្មណ៍អ្នកគាំទ្រជាមួយនឹងការផលិតដោយមានគុណភាពលំដាប់អន្តរជាតិ និងផ្ទាំងទស្សនីយភាពដ៏ប្លែកភ្នែក ស្របតាមបរិទសម័យឌីជីថលដ៏អស្ចារ្យ៕