ខេត្តពោធិ៍សាត់៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា ទីបំផុតអាកាសយានិកទាំងពីររូបគឺ លោក ស៊ុន ផល្លា និងលោក ខេង ឆៃយុទ្ធ ដែលជួបឧបទ្ទវហេតុ​ធ្លាក់ឧទ្ធម្ភាគចក្រអំឡុងពេល​ហ្វឹកហាត់​កាលពីថ្ងៃទី១២ ខែកក្កដា ឆ្នាំ២០២៤​​ ត្រូវបានក្រុមរុករកស្វែងរក​ឃើញ​កាលពីល្ងាចថ្ងៃទី២៩ ខែកក្កដា(លោក ខេង ឆៃយុទ្ធ)និងព្រឹកថ្ងៃទី៣០ ខែកក្កដា (លោក ស៊ុន ផល្លា) តែជាអកុសលលោកទាំងពីរពលី​បាត់​ទៅហើយ។

ក្នុងសន្និសីទសារព័ត៌មាន នៅព្រឹកថ្ងៃទី៣០ ខែកក្កដា ឆ្នាំ ២០២៤ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនា​ធិការ​ចម្រុះ នៃកងយោធពលខេមរភូមិន្ទ បានបញ្ជាក់ថា សពអាកាសយានិក​ទាំងពីររូបនឹងត្រូវយកមករៀបចំពិធីបុណ្យនៅ អគ្គបញ្ជាការដ្ឋានកងទ័ព​អាកាសនារាជធានីភ្នំពេញឱ្យស័ក្តិសមនឹងកិត្តិយសរបស់លោកទាំងពីរ។នាយឧត្តមសេនីយ៍បន្ត​ថា កាលពី​យប់ថ្ងៃទី២៩ ខែកក្កដា ពោលគឺ​បន្ទាប់ពីបានរកឃើញសាកសពលោក ខេង ឆៃយុទ្ធ, លោក​បានសុំ​គោល​ការណ៍ពី​សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងឯកឧត្ដម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដើម្បីនាំយក​សាកសពទៅ​រៀបចំពិធីបុណ្យនៅអគ្គមេបញ្ជាការ​ដ្ឋាន​កងទ័ពអាកាស ។

មកដល់រសៀលថ្ងៃទី៣០ ខែកក្កដា នេះបើទោះបីសាកសពអាកាស​យានិកទាំងពីរត្រូវបានរកឃើញនិងធ្វើការវេចខ្ចប់យ៉ាងសមរម្យបំផុត​យ៉ាងណាក៏ដោយ ក៏សពពុំទាន់ត្រូវបានយកចេញពីចំណុច​រកឃើញនៃភ្នំយ៉ាវយ៉ៃ នៃឃុំថ្មដា ស្រុកវាលវែង ខេត្តពោធិ៍សាត់មកកាន់ទីបញ្ជាការដ្ឋានទ័ពអាកាស ដើម្បីប្រារព្ធពិធីបុណ្យនៅឡើយទេ ដោយសារកត្តាអាកាសធាតុដ៏មិនអំណោយផល។

នាយឧត្តមសេនីយ៍ ឥត សារ៉ាត់ បានបញ្ជាក់ថា អាកាសធាតុអាក្រក់ជា​ឧបសគ្គក្នុងការស្វែងរក ក៏ដូចជាការបញ្ជូនសព។ លោកបញ្ជាក់ថា បើអាកាសធាតុល្អត្រឹមតែ២០ នាទីយើងអាចយកសពនិងបញ្ជូនសព​មកភ្លាម។ ប៉ុន្តែភ្លៀង អ័ព្ទខ្លាំងរហូត រំខានដល់ការងារនេះ។ លោកថា អ័ព្ទខ្លាំងចំងាយតែ៥ម៉ែត្រពីគ្នា ក៏មើលគ្នាមិនគ្នាឃើញដែរ។ ឆ្លៀតក្នុងឱកាសនោះនាយឧត្តមសេនីយ៍ ក៏បានសុំការយោគយល់ពី​សំណាក់មហាជន ជាពិសេសក្រុមគ្រួសារសពជាមុន ប្រសិនបើមាន​ការយឺតយ៉ាវ ។

សូមជម្រាបថា ឧទ្ធម្ភាគចក្រដែលបាត់ពីការទាក់ទងពេលហោះ​ហើរ​ម៉ាក Z-9 លេខ MH912 ត្រូវហ្វឹកហ្វឺនពីភ្នំពេញ-ថ្មដា-ពោធិ៍សាត់-ភ្នំពេញ។ ដោយចេញដំណើរពីថ្ងៃទី១២ ខែកក្កដា។ លើឧទ្ធម្ភា​គចក្រ​មានលោក ស៊ុន ផល្លា ជាប្រធានក្រុម និង​លោក ខេង ឆៃយុទ្ធ ជាអាកាស​យានិក។បន្ទាប់ពីបាត់ការទាក់ទងប្រតិបត្តិការស្វែងរកឧទ្ធម្ភាគចក្របានធ្វើឡើងក្រោមការដឹកនាំបញ្ជា​ផ្ទាល់​ពីថ្នាក់ដឹកនាំសំខាន់ៗ មាននាយឧត្តម​សេនីយ៍ ឥត សារ៉ាត់ អគ្គមេបញ្ជាការរងនាយសេនាធិការចម្រុះ នៃកងយោធពលខេមរភូមិន្ទ, នាយឧត្តមសេនីយ៍ ខឹមជា សាខឿន រដ្ឋលេខាធិការក្រសួងការពារជាតិ, នាយឧត្តមសេនីយ៍ សឹង សំណាង អគ្គមេបញ្ជាការរង មេបញ្ជាការកងទ័ពអាកាស, ឧត្តមសេនីយ៍ឯក ហួត ឈាង មេបញ្ជាការរង នាយសេនាធិការ កងទ័ពជើងគោក, ឧត្តម​សេនីយ៍ទោ សេង ធារិន មេបញ្ជការរង នាយសេនាធិការ យោធភូមិ​ភាគទី៥និង ឧត្តមសេនីយ៍ទោ ស៊ុ សំណាង មេបញ្ជាការ បញ្ជាការដ្ឋាន​ទ័ពពិសេស។ រហូតមកដល់ថ្ងៃទី៣០ ខែកក្កដា នេះ បេសកកម្មត្រូវ​បានបញ្ចប់ ដោយបានរកឃើញ ឧទ្ធម្ភាគចក្រធ្លាក់​នៅចំណុច​ចង្កេះភ្នំយ៉ាវយ៉ៃ ស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ និងសាកសពអ្នកបើកបរទាំងពីរនាក់៕

ប្រភព៖ ក្រសួងព័ត៌មាន