ភ្នំពេញ ថ្ងៃទី16 ខែសីហា ឆ្នាំ2024 – ជាផ្នែកមួយនៃការប្តេជ្ញាចិត្តរបស់ធនាគារក្នុងការលើកស្ទួយវិស័យ អប់រំ និងការអភិវឌ្ឍន៍ធនធានអ្នកដឹកនាំជំនាន់ក្រោយនៅក្នុងសហគមន៍ ធនាគារ ហ្វីលីព ដែលជាធនាគារ ពាណិជ្ជមានភាគទុនិកជនជាតិសិង្ហបុរីតែមួយគត់នៅកម្ពុជា បានធ្វើការសហការជាមួយសាលារៀនអន្តរជាតិទ្រូវីហ្សិនកម្ពុជា ដើម្បីផ្តល់អាហារូបករណ៍ដល់សិស្សពូកែចំនួន 12 នាក់។

 
កម្មវិធីនេះត្រូវបានធ្វើឡើងនាពេលព្រឹក នៅសាខា BM2 របស់សាលារៀនអន្តរជាតិទ្រូវីហ្សិនកម្ពុជា ក្នុងខណ្ឌសែនសុខ ដោយមានការចូលរួមពីមាតាបិតា សិស្សានុសិស្ស ក៏ដូចជាថ្នាក់ដឹកនាំពីស្ថាប័នទាំងពីរផងដែរ។ អាហារូបករណ៍នេះ ផ្តល់ជូនដល់សិស្សឆ្នើមដែលកំពុងសិក្សានៅថ្នាក់ទី1 ដល់ទី12 ដែលបានបង្ហាញលទ្ធផលល្អនៅក្នុងឆ្នាំសិក្សារបស់ខ្លួន។ ការផ្តល់ជូនអាហារូបករណ៍នេះ ត្រូវបានសង្ឃឹមថាអាចនឹងក្លាយជាផ្នែកមួយនៃការបំផុសគំនិតសម្រាប់ឱ្យសិស្សានុសិស្សបន្តខិតខំប្រឹងប្រែងបន្ថែមទៀតក្នុងឆ្នាំសិក្សាខាងមុខ។
 
លោក រ៉េម៉ុន ឈីហ៊្សេឡុង អគ្គនាយករងនៃធនាគារ ហ្វីលីព បានមានប្រសាសន៍ថា “ការលើកស្ទួយវិស័យអប់រំ និងការអភិវឌ្ឍន៍យុវជនដែលមានទេពកោសល្យ គឺការប្តេជ្ញាចិត្តដ៏សំខាន់មួយរបស់ធនាគារ ហ្វីលីព ចំពោះសហគមន៍ដែលយើងកំពុងបម្រើការ។ កម្មវិធីអាហារូបករណ៍នេះ គឺជាផ្នែកមួយនៃកិច្ចខិតខំប្រឹងប្រែងរបស់ធនាគារ ហ្វីលីព ក្នុងការចូលរួមចំណែកជាផលវិជ្ជមានមួយទៅដល់សហគមន៍កម្ពុជា”។

 
បណ្ឌិត សេង បូណា ស្ថាបនិក និង ជាប្រធានក្រុមប្រឹក្សាភិបាលសាលារៀនអន្តរជាតិទ្រូវីហ្សិនកម្ពុជា បានបង្ហាញសុទិដ្ឋិនិយមចំពោះភាពជាដៃគូនេះ ដោយសារស្ថាប័នទាំងពីរមានចក្ខុវិស័យដូចគ្នាក្នុងការគាំទ្រឱ្យសិស្សានុសិស្សម្នាក់ៗសម្រេចបាននូវសក្តានុពលខ្ពស់បំផុតរបស់ពួកគេ និងក្លាយជាទំពាំងស្នងឬស្សីដ៏រឹងមាំនៅក្នុងសង្គម។
 
លោក សេង បូណា បានមានប្រសាសន៍ថា “អាហារូបករណ៍នេះបានបង្ហាញឱ្យឃើញថានេះមិនត្រឹមតែជាការគាំទ្រផ្នែកហិរញ្ញវត្ថុប៉ុណ្ណោះទេ តែវាគឺជាការវិនិយោគដ៍ធំនាពេលអនាគតនៅក្នុងសហគមន៍របស់យើង និងជាសក្ខីភាពក្នុងការបញ្ជាក់ឱ្យឃើញអំពីឥទ្ធិពលនៃការអប់រំ ដែលអាចផ្លាស់ប្តូរជីវិតមនុស្សម្នាក់ៗបាន។ យើងរីករាយក្នុងការចូលរួមជាមួយនឹងចក្ខុវិស័យ និងការប្តេជ្ញាចិត្តរបស់ធនាគារ ហ្វីលីព ក្នុងការផ្តល់នូវការគាំទ្រយ៉ាងពេញទំហឹងទៅដល់អ្នកដឹកនាំជំនាន់ក្រោយ” ។

 
ក្រៅពីកម្មវិធីអាហារូបករណ៍ ធនាគារ ហ្វីលីព និងសាលារៀនអន្តរជាតិទ្រូវីហ្សិនកម្ពុជា គឺជាដៃគូដ៏ល្អជាយូរមកហើយ នៅក្នុងវិស័យអប់រំ ដោយសាលាជាចំណោមដៃគូដំបូងគេដែលចាប់ផ្តើមអនុវត្តដំណើរការទូទាត់សាច់ប្រាក់តាមរយៈ KHQR ។ គំនិតផ្តួចផ្តើមបែបនេះបានផ្តល់នូវភាពងាយស្រួលមួយកម្រិតទៀតសម្រាប់ឪពុកម្តាយសិស្សក្នុងការបង់ថ្លៃសិក្សារបស់កូនៗតាមរយៈកម្មវិធីធនាគារចល័ត Phillip Mobile ។
 
អំពីធនាគារ ហ្វីលីព
ធនាគារ ហ្វីលីព ផ្តល់ ជូន សេវាកម្ម និងផលិតផលហិរញ្ញវត្ថុដ៏សំបូរបែប តាម តម្រូវ ការ របស់ សាជីវកម្មធំៗ សហគ្រាសខា្នតតូច និង មធ្យម និងបុគ្គល។ ធនាគារ ហ្វីលីព ជាសមាជិករបស់ ហ្វីលីពកាពីតាល់គ្រុប ដែល មាន ទីស្នាក់ការកណ្តាលនៅប្រទេសសឹង្ហបុរី និងត្រូវ បាន បង្កើតឡើងតាំងពីឆ្នាំ1975។ ធនាគារ ហ្វីលីព ភីអិលស៊ី គឺជាធនាគារពាណិជ្ជរបស់សិង្ហបុរីតែមួយគត់ និងជាធនាគារពាណិជ្ជខ្នាតមធ្យមមួយនៅក្នុងប្រទេសកម្ពុជា ដែលមាន ច្រើន ជាង 70សាខា ទូទាំងប្រទេស។

 
អំពីសាលារៀនអន្តរជាតិទ្រូវីហ្សិនកម្ពុជា (TVIS)

សាលារៀនអន្តរជាតិទ្រូវីហ្សិនកម្ពុជាត្រូវបានបង្កើតឡើងក្នុងឆ្នាំ ២០១៣ ដោយលោកបណ្ឌិត សេង បូណា ដែលសាលារៀនអន្តរជាតិទ្រូវីហ្សិនកម្ពុជាមាន បេសកកម្មច្បាស់លាស់  មានការប្តេជ្ញាចិត្តច្បាស់លាស់ និងរឹងមាំក្នុងការកសាងសិស្សដែលមានអោយមាន លក្ខណៈជាគំរូ និងភាពជាអ្នកដឹកនាំ។ សាលារៀនអន្តរជាតិទ្រូវីហ្សិនកម្ពុជា ជឿជាក់យ៉ាងមុតមាំ និងដំណើរឆ្ពោះទៅមុខរបស់សិស្សានុសិស្ស បន្ទាប់ពីសិស្សបានបញ្ចប់ការសិក្សា ដោយបទពិសោធន៍ជីវិតរបស់ពួកគេនឹងត្រូវបានផ្លាស់ប្តូរតាមរយះការអប់រំនៅទ្រូវីហ្សិន។
កម្មវិធីសិក្សាត្រូវបានជ្រើសរើសយ៉ាងយកចិត្តទុកដាក់ពីបណ្តាប្រទេសទំនើបៗដូចជា សិង្ហបុរី សហរដ្ឋអាមេរិក នូវែលហ្សេឡង់ អូស្ត្រាលី និងអង់គ្លេស ដើម្បីផ្តល់ការអប់រំមួយអោយសិស្សមានជំនាញគណិតវិទ្យា និងអក្ខរកម្ម។

ជាមួយនឹងសាខាចំនួន 10 ក្នុងឆ្នាំ2024 សាលារៀនអន្តរជាតិទ្រូវីហ្សិនកម្ពុជាផ្តល់ការអប់រំចាប់ពីកម្រិតមត្តេយ្យដល់កម្រិតវិទ្យាល័យ។ លើសពីនេះ សាលារៀ អន្តរជាតិទ្រូវីហ្សិនកម្ពុជាបានពង្រីកភាពជាដៃគូជា សកលដែលរួមមាន នូវែលហ្សេឡង់ សិង្ហបុរី អូស្ត្រាលី ចក្រភពអង់គ្លេស និងសហរដ្ឋអាមេរិក ដែលសិស្សបានចូលរួមក្នុងកម្មវិធីផ្លាស់ប្តូរការសិក្សាជាមួយសាលារៀនជាមួយបណ្តាសាលាជាដៃគូនៅឯបរទេស។ សិស្សទ្រូវីហ្សិនមានសិទ្ធិចូលប្រឡងតេស្តសមត្ថភាពអង់គ្លេស IELTS និង Cambridge ដើម្បីបន្តការសិក្សានៅក្រៅបរទេស។ តាមរយៈភាពជាដៃគូ សិស្សអាចសិក្សារយះពេលខ្លីនៅសាលាដៃគូរ និង ក្រៅប្រទេស ហើយសិស្សអាចផ្ទេរការសិក្សាតាមរយះប្រព័ន្ទផ្ទេរការសិក្សាអន្តរជាតិ(ICT) បន្ទាប់ពីពួកគេបានបញ្ចប់វគ្គសិក្សា៕