ម៉ាឡេស៊ី៖ ប្រទេសម៉ាឡេស៊ីកំពុងសម្រុកចាក់វ៉ាក់សាំងការពារជំងឺរលាកសួតជូនពលរដ្ឋនៅក្នុងទូទាំងប្រទេស ក្រោយករណីស្លាប់បង្កឡើងដោយជំងឺមួយនេះបានបន្តកើនឡើងគួរឱ្យកត់សម្គាល់នៅក្នុងរយៈពេលប៉ុន្មានឆ្នាំចុងក្រោយនេះ។ យោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ​ ទី២៥ ខែវិច្ឆិកាបាន​បញ្ជាក់ថា កាលពីឆ្នាំ ២០២៣កន្លងទៅនេះ​ តួលេខអ្នកស្លាប់ដោយជំងឺរលាកសួតនៅទូទាំងប្រទេសម៉ាឡេស៊ីមានរហូតដល់ ១៨,១៨១ករណី ខណៈកាលពីឆ្នាំ ២០១៤កន្លងទៅករណីស្លាប់ដោយជំងឺនេះមានត្រឹមតែ ៩,២៥០ករណីប៉ុណ្ណោះ។

ប្រភពខាងលើបានបន្តថា ជាមួយនឹងតួលេខអ្នកស្លាប់ជាង ១,៨ម៉ឺននាក់កាលពីឆ្នាំ ២០២៣កន្លងទៅនេះ ជំងឺរលាកសួតបានក្លាយជាជំងឺដែលបានបណ្តាលឱ្យមានពលរដ្ឋម៉ាឡេស៊ីស្លាប់ច្រើនជាងគេបំផុតផងដែរ បើមិនរាប់បញ្ចូលជំងឺរាតត្បាតសកលកូវីដ-១៩ កាលពីឆ្នាំ ២០២១ នោះទេ។ សូមបញ្ជាក់ជូនថា ជំងឺរលាកសួតគឺជាជំងឺប្រព័ន្ធផ្លូវដង្ហើមម្យ៉ាង ដែលបង្កឱ្យមានអាការមួយចំនួនដូចជា៖

-ពិបាកដកដង្ហើម

-ក្អក​ខ្លាំង អាចជាក្អកមាន​កំហាកហើយកំហាក​នោះអាចមានពណ៌​បៃតងរឺលឿង

-គ្រុនក្តៅ

-អស់កម្លាំង

-តឹងទ្រូង។

ក្នុងករណីដែលលោកកើតមានអាការដូចបានជម្រាបជូនខាងលើនេះ ហើយមិនប្រញាប់ទៅព្យាបាលឱ្យបានទាន់ពេលវេលានោះទេ លោកអ្នកអាចបន្តធ្លាក់ខ្លួនឈឺធ្ងន់ធ្ងររហូតត្រូវស្លាប់បាត់បង់ជីវិតតែម្តង៕

អត្ថបទ៖ ភក្តី

ប្រភព៖ The Strait Time