ចិន៖ ខណៈដែលអាកាសធាតុបានបន្តចុះត្រជាក់កាន់តែខ្លាំងនិងអមជាមួយព្រិលធ្លាក់យ៉ាងច្រើនផងនោះ អាជ្ញាធរចិនបានសម្រេចដាក់ចេញវិធានការមួយចំនួនដើម្បីទប់ស្កាត់គ្រោះថ្នាក់ផ្សេងៗដែលអាចកើតឡើងដោយយថាហេតុ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីយប់ថ្ងៃទី ២៨​ ខែវិច្ឆិកា។ វិធានការដែលអាជ្ញាធរចិនបានចាក់ចេញជាបន្ទាន់នោះរួមមាន ទាញសញ្ញាអាសន្នកម្រិតទី ៤ នៅតាមទីតាំងមួយចំនួន ខណៈទីតាំងខ្លះត្រូវទាញសញ្ញាអាសន្នរហូតដល់កម្រិតទី ១ ឬកម្រិតក្រហម ដែលជាកម្រិតខ្ពស់បំផុតផងដែរ។

ប្រភពខាងលើបានបន្តថា បញ្ហាអាកាសធាតុដែលប្រទេសចិនកំពុង​ប្រឈមនៅពេលនេះគឺបានកើតឡើងនៅតំបន់ភាគជើងប្រទេស មានដូចជាខេត្ត Heilongjiang ខេត្ត Jilin ខេត្ត Qinghai និងខេត្ត Gansu ជាដើម ដែលសីតុណ្ហភាពបានចុះដល់កម្រិតក្រោម ១០អង្សាសេ និងមានអមដោយព្រិលធ្លាក់យ៉ាងក្រាស់ផងដែរ។ យ៉ាងណាក្តី គិតត្រឹមពេលនេះនៅមិនទាន់មានសេចក្តី​រាយការណ៍ណាមួយបង្ហាញថា មានគ្រោះថ្នាក់ធ្ងន់ធ្ងរបានកើតឡើងចំពោះប្រជាពលរដ្ឋនោះទេ ខណៈបញ្ហាដែលកំពុងកើតមានជាក់ស្តែងមានដូចជា ពលរដ្ឋពិបាកធ្វើដំណើរ កកស្ទះចរាចរណ៍នៅលើដងផ្លូវមួយចំនួន សកម្មភាពអាជីវកម្មមួយចំនួនត្រូវបានផ្អាក ខណៈតំបន់ខ្លះត្រូវប្រឈមនិងបញ្ហាគ្មានភ្លើងអគ្គិសនីប្រើប្រាស់ផងដែរ៕

អត្ថបទ៖ ភក្តី

ប្រភព៖ The Strait Time