ចិន៖ តួលេខអ្នកបាត់បង់ជីវិតដោយសារគ្រោះរញ្ជួយដីតំបន់ជើងភ្នំហិម៉ាឡៃបានកើនឡើងដល់ចំនួន ១២៦នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time នៅព្រឹកថ្ងៃពុធ ទី៨​ ខែមករា។ ចំពោះតួលេខអ្នករងរបួសវិញ គឺគិតត្រឹមពេលនេះមានចំនួន ១៨៨នាក់ ហើយនៅក្នុងនោះគឺមានមួយចំនួនបានរងរបួសធ្ងន់ធ្ងរផងដែរ។

បើតាមអាជ្ញាធរចិនបានបញ្ជាក់ថា គិតត្រឹមពេលនេះក្រុមអ្នកជួយសង្គ្រោះក៏បានជួយសង្គ្រោះពលរដ្ឋ ដែលជាប់នៅក្រោមគំនរបាក់បែកបានចំនួន ៤០០នាក់ ខណៈមានពលរដ្ឋចំនួន ៣០,០០០នាក់ត្រូវបង្ខំចិត្តផ្លាស់ប្តូរទីលំនៅផងដែរ។ គួររម្លឹកជូនថា​ កាលពីថ្ងៃអង្គារ ទី៧ ខែមករា ម្សិលមិញនេះ តំបន់ទីបេ នៃប្រទេសចិន ដែលមានចម្ងាយប្រមាណជា ៨០គីឡូម៉ែត្រពីភាគខាងជើងនៃភ្នំ Everest បានទទួលរងការវាយប្រហារដោយគ្រោះរញ្ជួយដីកម្រិត  ៦,៨រ៉ិចទ័រ  ខណៈការរញ្ជួយក៏បានរាលដាលដល់ប្រទេសមួយចំនួននៅក្បែរតំបន់នោះផងដែរ ដូចជាប្រទេសនេប៉ាល់ ប៊ូតង់ និងឥណ្ឌា៕

 អត្ថបទ៖ ភក្តី

ប្រភព៖ The Strait Time