ចិនកំពុងពិចារណាលក់ TikTok ឱ្យទៅលោកមហាសេដ្ឋី Elon Musk

ចិន៖ ចិនកំពុងពិចារណាអំពីជម្រើសក្នុងការលក់បណ្តាញសង្គម TikTok ឱ្យទៅលោកមហាសេដ្ឋី Elon Musk នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃអង្គារ ទី១៤ ខែមករា។ ជម្រើសនៃការលក់បណ្តាញសង្គម TikTok ឱ្យទៅលោកមហាសេដ្ឋី Elon Musk នេះអាចនឹងកើតមានឡើង ប្រសិនបើច្បាប់ហាមឃាត់បណ្តាញសង្គមដ៏មានប្រជាប្រិយភាពនេះ ត្រូវបានអនុវត្តជាផ្លូវការនៅសហរដ្ឋអាមេរិកក្នុងពេលដ៏ឆាប់ខាងមុខនេះ។

គួរកត់សម្គាល់ថា នាពេលបច្ចុប្បន្នបណ្តាញសង្គម TikTok កំពុងស្ថិតនៅក្រោមការគ្រប់គ្រងរបស់ក្រុមហ៊ុន Bytedance ដែលមានមូលដ្ឋាននៅក្នុងប្រទេសចិន ខណៈ​នាពេលកន្លងមកសហរដ្ឋអាមេរិកតែងចោទប្រកាន់ថា TikTok គឺជាបណ្តាញចារកម្មរបស់ចិន ពោលគឺ TikTok តែងលួចប្រមូលទិន្នន័យផ្ទាល់ខ្លួនរបស់អ្នកប្រើប្រាស់នៅសហរដ្ឋអាមេរិក ដើម្បីផ្តល់ទៅឱ្យរដ្ឋាភិបាលចិន។ នៅចំពោះមុខការចោទប្រកាន់នេះ អាជ្ញាធរអាមេរិកបានផ្តល់ជម្រើស ២ ឱ្យទៅក្រុមហ៊ុន Bytedance ដោយជម្រើសទី ១ គឺក្រុមហ៊ុនត្រូវលក់ភាគហ៊ុនខ្លះឱ្យទៅអាមេរិកជាអ្នកគ្រប់គ្រង ដើម្បីឱ្យអាមេរិកអាចរក្សាសុវត្ថិភាពទិន្នន័យរបស់អ្នកប្រើប្រាស់នៅទឹកដីអាមេរិកបាន។ ជម្រើសទី ២ គឺ បើក្រុមហ៊ុន Bytedance មិនព្រមលក់ភាគហ៊ុនខ្លះឱ្យទៅអាមេរិកគ្រប់គ្រងនោះទេ គឺរដ្ឋាភិបាលអាមេរិកនឹងបង្កើតច្បាប់ហាមឃាត់មិនឱ្យមានការប្រើប្រាស់បណ្តាញសង្គមមួយនេះនៅអាមេរិកតែម្តង។

សូមបញ្ជាក់ជូនផងដែរថា គិតត្រឹមពេលនេះច្បាប់ដែលអាមេរិកគ្រោងនឹងបង្កើតឡើងដើម្បីដាក់សម្ពាធដល់បណ្តាញសង្គម TikTok នោះគឺត្រូវបានរៀបចំរួចរាល់ហើយ ខណៈសភាអាមេរិកក៏បានបោះឆ្នោតសម្រេចហើយដែរ ហើយតាមគម្រោងគឺច្បាប់ដ៏តឹងរឹងនេះនឹងត្រូវចូលជាធរមាន ឬអាចយកទៅអនុវត្តបាននៅក្នុងអំឡុងខែកុម្ភៈឆ្នាំ ២០២៥នេះ។ សូមបញ្ជាក់ជូនបន្ថែមថា នៅលើទឹកដីអាមេរិកទាំងមូលគិតត្រឹមពេលនេះគឺមានអ្នកប្រើប្រាស់បណ្តាញសង្គម TikTok ប្រមាណជា ១៧០លាននាក់ ហើយនៅក្នុងនោះក៏មានអ្នកប្រើប្រាស់មួយចំនួន បានកំពុងប្រើប្រាស់ TikTok ធ្វើជាមធ្យោបាយផ្សព្វផ្សាយអាជីវកម្មរបស់ពួកគេយ៉ាងមានសក្តានុពលផងដែរ៕

អត្ថបទ៖ ភក្តី

ប្រភព៖ Channel News Asia