កូរ៉េខាងត្បូង៖ អតីតប្រធានាធិបតីនៃប្រទេសកូរ៉េខាងត្បូង លោក Yoon Suk Yeol និងភរិយាគឺលោកស្រី  Kim Keon Hee នឹងចាកចេញពីលំនៅដ្ឋានប្រធានាធិបតីផ្លូវការនៅក្នុងថ្ងៃទី១១ ខែមេសា នេះបើយោងតាមការចុះផ្សាយរ​បស់បណ្តាញសារព័ត៌មាន The Strait Time នៅក្នុងថ្ងៃព្រហស្បតិ៍ ទី១០ ខែមេសា។ ក្នុងការចាកចេញនេះ លោក Yoon Suk Yeol និងលោកស្រី  Kim Keon Hee អាចយកតាមខ្លួនបានត្រឹមតែសត្វចិញ្ចឹមចំនួន ១១ក្បាលប៉ុណ្ណោះ។

ប្រភពខាងលើបានបន្តថា លោក Yoon Suk Yeol និងភរិយា ពុំមានកូននោះទេ ហើយមុនពេលចូលកាន់ដំណែងជាប្រធានាធិបតី ពួកគាត់ទាំង ២មានសត្វចិញ្ចឹមចំនួន ៧ក្បាល ដោយក្នុងនោះមានសត្វឆ្កែចំនួន​ ៤ក្បាល និងសត្វឆ្មាចំនួន ៣ក្បាល ហើយរហូតមកទល់នឹងពេលនេះសត្វឆ្កែនិងឆ្មាដែលពួកគាត់កំពុងចិញ្ចឹមបានកើនឡើងដល់ចំនួន ១១ក្បាល។ សូមបញ្ជាក់ជូនថា ក្នុងអំឡុងពេលកាន់ដំណែងជាប្រធានាធិបតី លោក Yoon Suk Yeol និងភរិយាត្រូវស្នាក់នៅក្នុងគេហដ្ឋានផ្លូវការមួយ នៅក្នុងតំបន់ Hannam-dong នៃ ទីក្រុងសេអ៊ូល ដែលជាទីកន្លែងសម្រាប់ស្នាក់នៅផងនិងបំពេញការងារក្នុងនាមជាប្រធានាធិបតីផងដែរ៕

អត្ថបទ៖ ភក្តី

ប្រភព៖ The Strait Time