អាមេរិក៖ រដ្ឋបាលអាមេរិកក្រោមការដឹកនាំរបស់លោក ដូណាល់ ត្រាំ នឹងពន្យាពេលនៃការបិទបណ្តាញសង្គម TikTok ជាថ្មីម្តងទៀត ដែលការពន្យាពេលនេះគឺជាលើកទី៤ ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១៥ ខែ កញ្ញា។ យោងទៅតាមសេចក្តីសម្រេចនាពេលកន្លងមក គឺក្រុមហ៊ុន ByteDance ត្រូវសម្រេចចិត្តលក់បណ្តាញសង្គម TikTok ឬទុកឱ្យអាជ្ញាធរអាមេរិកបិទបណ្តាញសង្គមមួយនេះត្រឹមថ្ងៃទី១៧ ខែកញ្ញា។

យ៉ាងណាក្តី រដ្ឋបាលអាមេរិកនៅមិនទាន់កំណត់ពេលវេលាជាក់លាក់នៃការអនុវត្តច្បាប់បិទបណ្តាញសង្គម TikTok ថ្មីនៅឡើយទេ ដោយរដ្ឋបាលអាមេរិកបានឱ្យដឹងត្រឹមថា ការសម្រចពន្យាពេលជាថ្មីម្តងទៀតគឺដើម្បីទុកពេលវេលាឱ្យបានគ្រប់គ្រាន់សម្រាប់ឱ្យក្រុម ByteDance និងអាជ្ញាធរអាមេរិកធ្វើការចរចារនិងស្វែងរកដំណោះស្រាយសមស្របមួយ។ សូមបញ្ជាក់ជូនថា រឿងរ៉ាវចម្រូងចម្រាស់រវាងក្រុមហ៊ុន ByteDance និងអាជ្ញាធរអាមេរិក បានកើតឡើងតាំងតែពីអាណត្តិដឹកនាំរបស់លោក ចូ បៃឌិន ម្លេះ ដោយអាជ្ញាធរអាមេរិកបានចោទប្រកាន់ថា TikTok គឺជាបណ្តាញចារកម្មរបស់រដ្ឋបាភិបាលចិន ដែលតែងលួចប្រមូលទិន្នន័យផ្ទាល់ខ្លួនរបស់អ្នកប្រើប្រាស់នៅអាមេរិកផ្តល់ឱ្យរដ្ឋាភិបាលចិនដោយសម្ងាត់ ហើយប្រសិនបើ TikTok ចង់បន្តដំណើរការនៅអាមេរិក គឺក្រុមហ៊ុន ByteDance ត្រូវលក់ភាគហ៊ុនខ្លះឱ្យភាគីអាមេរិកគ្រប់គ្រង ហើយបើមិនដូចនោះទេអាមេរិកនឹងបិទបណ្តាញសង្គមមួយនេះមិនឱ្យដំណើរនៅលើទឹកដីអាមេរិកតែម្តង៕

អត្ថបទ៖ ភក្តី

ប្រភព៖The Strait Time