YouTuber ជនជាតិហូឡង់ពីរនាក់ត្រូវបានចាប់ខ្លួន ដោយសារចូលទៅតំបន់ហាមឃាត់ Area 51

ជនជាតិហូឡង់ពីរនាក់ត្រូវបានចាប់ខ្លួន ពីបទចូលទៅ Area 51 ដែលជាតំបន់ហាមឃាត់របស់សន្តិសុខជាតិនេវ៉ាដា។ ពួកគេទាំងពីរមានឈ្មោះ Ties Granzier អាយុ ២០ឆ្នាំ និង Govert Charles Wilhelmus Jacob Sweep អាយុ ២១ឆ្នាំ ជា YouTuber ជនជាតិហូឡង់។ ពួកគេត្រូវបានចាប់ខ្លួនដោយសារបានចូលទៅកៀកទីតាំងនោះចម្ងាយ ៣ម៉ាយទៅខាងក្នុង ដោយសារតែមួយរយៈចុងក្រោយនេះមានការផ្ទុះឡើងនូវទ្រឹស្តីឃុបឃិតជាច្រើនដែលចោទថា រដ្ឋាភិបាលអាមេរិកបានលាក់បាំងរឿងរ៉ាវមនុស្សក្រៅភព (Alien) និង UFO នៅទីនោះ ក៏ដូចជាការចោទថា បេសកកម្ម Apollo 11 ជារឿងបោកប្រាស់ ដែលគេបង្កើតឈុតឆាកនៅទីនោះ។

ដើមហេតុគឺវាចេញពីចលនា “Storm Area 51” ដែលជាគម្រោងចូលលុកលុយទៅតំបន់ហាមឃាត់នោះ ជាមួយនឹងការចូលរួមពីបណ្ដាអ្នកលេងបណ្ដាញយ៉ាងច្រើនកុះករ។ យ៉ាងណាក៏ដោយជនជាតិហូឡង់ទាំងពីរនាក់បានសារភាពថា បានចូលទៅម្ដុំនោះមែន ប៉ុន្តែមិនមានបំណងអាក្រក់នោះទេ។ ពួកគេគ្រាន់តែចង់ឃើញដោយផ្ទាល់ភ្នែក ដូច្នេះហើយទើបបានជាពួកគេចូលទៅទីនោះមុនថ្ងៃបរិច្ឆេទ។ ពួកគេត្រូវបានចាប់ខ្លួនកាលពីថ្ងៃទី១០ ខែកញ្ញា ហើយត្រូវបានគេពិន័យជាប្រាក់ ២,២៨០ដុល្លារអាមេរិក/ម្នាក់ ជាមួយនឹងការសម្រាកក្នុងគុករយៈពេល ៣ថ្ងៃ។ មន្ត្រីប៉ូលីសក៏បានបន្ថែមដែរថា ពួកគេប្រកាន់ជំហរចាប់ខ្លួនអ្នកដែលចូលទៅតំបន់ហាមឃាត់បែបនេះ ព្រោះពួកគេមិនអាចទទួលយកគំនិតមិនសមហេតុសមផលនៃចលនានេះទេ៕

អត្ថបទ៖ លីដា