ជប៉ុនបិទសាលារៀនមួយខែ ដើម្បីសុវត្ថិភាពក្មេងៗ ខណៈ COVID-19 រាលដាលខ្លាំងលើពិភពលោក
- February 28, 2020
ដើម្បីការពារពលរដ្ឋ ពិសេសក្មេងៗពីជំងឺផ្លូវដង្ហើមថ្មី បង្កដោយវីរុស Covid-19 នាយករដ្ឋមន្ត្រីជប៉ុន បានសម្រេចចិត្ត បិទទ្ចារសាលាមួយខែ ដើម្បីទប់ស្កាត់ការរីករាលដាលកាន់តែខ្លាំង។ នាយករដ្ឋមន្ត្រីជប៉ុនលោក Shinzo Abe កាលពីថ្ងៃព្រហស្បត្តិ៍ បានសម្រេចបិទទ្វារសាលារៀនទាំងអស់ទូទាំងប្រទេស ចាប់ពីថ្ងៃ ២ មីនា ដល់ថ្ងៃ ៦ មេសា ក្នុងចេតនាប្រយុទ្ធប្រឆាំងពីការឆ្លងរាលដាលកាន់តែខ្លាំងឡើងក្នុងទឹកដីរបស់ខ្លួន។
ចំណាត់ការនេះ ធ្វើឡើងតាមសំណើរបស់មន្ត្រីអប់រំជប៉ុន ក្រោយកោះហុកកៃដូ កាលពីថ្ងៃព្រហស្បត្តិ៍ បានបិទទ្វារសាលារៀនសរុប ១៦០០កន្លែង។ដោយឡែក បណ្តាលអនុវិទ្យាល័យ និងបឋមសិក្សា ក្នុងទីក្រុងអ៊ីឈិកាវ៉ា ខេត្តឈីបា នឹងចាប់ផ្តើមបិទទ្វារចាប់ពីថ្ងៃសុក្រនេះ ក្រោយមានការឆ្លងរាលវិរុសជាច្រើនករណីបន្តបន្ទាប់ ដោយក្នុងនោះមានទាំងក្មេងអាយុក្រោម ១០ឆ្នាំ ចំនួន ២ នាក់ទៀតផង។ លោក Shinzo Abe លើកឡើងថា នៅសប្តាហ៍ក្រោយ ឬ ២សប្តាហ៍ទៀត កងកម្លាំងពិសេសប្រយុទ្ធវីរុសកូរ៉ូណាថ្មី នឹងចាប់ផ្តើមបើកយុទ្ធនាការប្រយុទ្ធប្រឆាំងទ្រង់ទ្រាយធំ ដើម្បីទប់ស្កាត់ការរីករាលដាលឲ្យខានតែបាន។
លោកថា អំឡុងពេលនេះ សុខភាព និងសុវត្ថិភាពក្មេងៗ ជារឿងអាទិភាព។ជាមួយគ្នានេះ នាយករដ្ឋមន្ត្រីជប៉ុន ក៏បង្ហាញពីក្តីបារម្ភខ្លាំង ពីការផ្ទុះរីករាលដាលវីរុសនេះកាន់តែខ្លាំងទូទាំងប្រទេសជប៉ុន ស្របពេលជប៉ុនកាលពីល្ងាចថ្ងៃព្រហស្បត្តិ៍ ចំនួនអ្នកឆ្លងវីរុស Covid-19 ថ្មី មានដល់ទៅ ២១០ នាក់បន្ថែមទៀត នាំឲ្យចំនួនអ្នកឆ្លងសរុបក្នុងប្រទេសជប៉ុន កើនដល់ជាង ១០០០នាក់ ខណៈចំនួនអ្នកស្លាប់កើនដល់ ៣៦នាក់។
ជាមួយគ្នានេះដែរWOH កាលពីម្សិលមិញក៏បានព្រមានទៅកាន់ប្រទេសទាំងអស់លើពិភពលោកកុំឲ្យគិតថាប្រទេសរបស់ខ្លួនអាចគេចផុតពីវីរុស COVID-19 ដោយថាការគិតបែបនេះអាចជាកំហុសធំមួយ។ WHO លើកឡើងថាប្រទេសអ្នកមានក៏មានជួបបញ្ហាឆ្លងវីរុសនេះដែរ ខណៈវីរុស COVID-19 កំពុងរាលដាលខ្លាំងលើពិភពលោក។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: