រដ្ឋបាលរបស់លោក ដូណាល់ ត្រាំ នឹងមិនចូលរួមកម្មវិធី COVAX ដែលផ្ដួចផ្ដើមដោយ WHO នោះទេ ព្រោះជាអង្គការពុករលួយ

យោងតាមការចុះផ្សាយរបស់សារព័ត៌មាន វ៉ាស៊ីនតោនប៉ុស្ដិ៍ បានរាយការណ៍ថា រដ្ឋបាលរបស់លោក ដូណាល់ ត្រាំ នឹងមិនចូលរួមកម្មវិធី COVAX ដែលជាកិច្ចសហប្រតិបត្តិការអន្តរជាតិ ដើម្បីអភិវឌ្ឍ និងចែកចាយវ៉ាក់សាំងប្រឆាំងនឹងជំងឺ COVID-19 ក្រោមការផ្តួចផ្ដើមដោយអង្គការសុខភាពពិភពលោកនោះទេ ហើយបានហៅអង្គការនេះថាជាអង្គការពុករលួយ។ នេះគឺជាការឆ្លើយតបថ្មីមួយទៀត បន្ទាប់ពីលោក ដូណាល់ ត្រាំ បានដកខ្លួនចេញពីអង្គការមួយនេះ កាលពីខែកក្កដា ដោយកាលនោះលោកបាននិយាយថា WHO ត្រូវការការកែទម្រង់ ហើយអង្គការនេះបានទទួលឥទ្ធិពលយ៉ាងខ្លាំងពីប្រទេសចិន។

ជម្រាបដែរថាកម្មវិធី COVAX ជាការផ្ដួចផ្ដើមរបស់អង្គការសុខភាពពិភពលោក (WHO) ដែលនឹងអនុញ្ញាតឱ្យប្រទេសនានា ទាញយកប្រយោជន៍វ៉ាក់សាំងដែលមានសក្តានុពល ដើម្បីធានាថាពលរដ្ឋរបស់ប្រទេសដែលចូលរួមទាំង ១៥០ប្រទេស បានទទួលវ៉ាក់សាំងគ្រប់គ្នានៅពេលវ៉ាក់សាំងដែលមានប្រសិទ្ធភាពផលិតចេញមក។ WHO និយាយថា សូម្បីតែរដ្ឋាភិបាលដែលធ្វើកិច្ចព្រមព្រៀងជាមួយអ្នកផលិតវ៉ាក់សាំងផ្សេង ក៏នឹងទទួលបានអត្ថប្រយោជន៍ពីការចូលរួមជាមួយ COVAX ព្រោះវានឹងផ្តល់វ៉ាក់សាំងបម្រុងទុក ក្នុងករណីដែលកិច្ចព្រមព្រៀងត្រូវបានធ្វើឡើងតាមរយៈកិច្ចព្រមព្រៀងទ្វេភាគីជាមួយក្រុមហ៊ុនផលិតមិនទទួលបានជោគជ័យ៕

អត្ថបទ៖ លីដា
ប្រភព៖ វ៉ាស៊ីនតោនប៉ុស្ដិ៍