ផ្ទុះការភ្ញាក់ផ្អើល ក្រោយសណ្ឋាគារមួយនៅថៃ បានយករចនាបថចម្លាក់អង្គរវត្ត អង្គរធំ និងប្រាសាទបន្ទាយស្រី របស់កម្ពុជា ទៅសង់ដាក់សណ្ឋាគារខ្លួន

យោងតាម Page ដែលមានឈ្មោះថា Amazing SEA Culture បានឲ្យដឹងថា មានសណ្ឋាគារថៃមួយដែលមានឈ្មោះថា “Le Palais Hotel”បានយករចនាបថនៃសម្បតិ្តបេតិកភណ្ឌពិភពលោកដែលជាកម្មសិទ្ធរបស់ប្រទេសកម្ពុជាជាច្រើនទៅសង់ឡើងវិញ ដើម្បីតុបតែងលម្អក្នុងបរិវេណសណ្ឋាគាររបស់ពួកគេ។ សណ្ឋាគាររបស់ថៃមួយនេះមានទីទាំងស្ថិតនៅកោះ Ko Pha Ngan ខេត្ត Surat Thani ភាគខាងត្បូងនៃប្រទេសថៃ។ ចំពោះរចនាបថនៃប្រាសាទរបស់ប្រទេសកម្ពុជាដែលសណ្ឋាគារថៃមួយនេះបានយកទៅសង់ឡើងវិញនោះមានដូចជា រូបចម្លាក់នៃប្រាសាទអង្គរវត្ត ប្រាសាទអង្គរធំ និងប្រាសាទបន្ទាយស្រី។

Amazing SEA Culture បានបន្តថា កន្លងមកប្រទេកម្ពុជាធ្លាប់បានផ្តល់សិទ្ធិទៅកាន់ប្រទេសអេស្ប៉ាញនិងថ្មីៗនេះគឺប្រទេសចិន សម្រាប់ឲ្យប្រទេសទាំងពីរនេះអាចយករចនាបថនៃចម្លាក់ប្រាសាទកម្ពុជាទៅសាងសង់ឡើងវិញបាន តែសម្រាប់ប្រទេសថៃនៅមិនទាន់ទទួលបានសិទ្ធិនេះឡើយទេ។ ហេតុដូចនេះហើយ ទើប Amazing SEA Culture ចោទសួរថា តើសណ្ឋាគារថៃពិតជាបានសុំសិទ្ធិត្រឹមត្រូវពីប្រទេសកម្ពុជាឬអត់? ហើយចំពោះភាគីខាងកម្ពុជាវិញតើបានដឹងរឿងនេះហើយឬនៅ? Page មួយនេះក៏បានបញ្ជាក់ផងដែរថា ចង់ឲ្យប្រទេសនៅលើពិភពលោកទាំងអស់ចេះគោរពគ្នានិងផ្តល់កិត្តិយសឲ្យគ្នាទៅវិញមកនិងកុំយកស្នាដៃរបស់ប្រទេសណាមួយទៅធ្វើជារបស់ខ្លួនអី។

ក្នុងករណីប្រទេសណាមួយយកស្នាដៃរបស់ប្រទេសណាមួយផ្សេងទៀតមកសាងសង់ឡើងវិញ ប្រទេសទាំងនោះត្រូវតែសុំសិទ្ធិពីប្រទេសដែលជាម្ចាស់កម្មសិទ្ធជាមុនសិនដើម្បីជាការផ្តល់កិត្តិយស ហើយពេលសាងសង់រួចគួរប្រាប់ឈ្មោះប្រទេសដែលជាម្ចាស់កម្មសិទ្ធនោះផង ដើម្បីចូលរួមផ្សព្វផ្សាយស្នាដៃទាំងនោះប្រកបដោយក្រមសីលធម៌៕

អត្ថបទ៖ភក្តី

ប្រភព៖ Amazing SEA Culture