កាសែត Global Times របស់រដ្ឋចិនបានចំអកលោក ដូណាល់ ត្រាំ និងលោកជុំទាវទី១ បន្ទាប់ពីអ្នកទាំងគូបានវិជ្ជមានជាមួយជំងឺកូវីដ១៩

អ្នកនិពន្ធកាសែតរដ្ឋរបស់ចិនដ៏មានឥទ្ធិពលមួយ បានចំអកឱ្យលោក ដូណាល់ ត្រាំ បន្ទាប់ពីលោកប្រធានាធិបតី និងលោកជំទាវទី១ មេឡានៀ ត្រាំ បានធ្វើតេស្តវិជ្ជមានចំពោះជំងឺ COVID-19។ លោក Hu Xijin នាយកផ្នែកសរសេររបស់កាសែត Global Times ដែលជាកាសែតធំ និងជាអ្នកនាំពាក្យរបស់បក្សកុម្មុយនីស្តចិនបាននិយាយថា វាសមមុខរបស់លោកប្រធានាធិបតី ត្រាំ និងភរិយា ចំពោះការមើលស្រាលជាមួយជំងឺ COVID-19 នេះ។

លោកបានអះអាងថា ការធ្វើរោគវិនិច្ឆ័យបានបង្ហាញពីភាពធ្ងន់ធ្ងរនៃការផ្ទុះឡើងនៃវីរុសនេះ ហើយនឹងបំផ្លាញការបោះឆ្នោតឡើងវិញនាពេលខាងមុខរបស់លោក ដូណាល់ ត្រាំ។ ការនិយាយចំអករបស់លោក Hu Xijin ធ្វើឡើងបន្ទាប់ពីមេដឹកនាំអាមេរិកបានបញ្ជាក់ពីព័ត៌មាននេះនៅល្ងាចថ្ងៃព្រហស្បតិ៍ ដោយសរសេរថា៖«យប់នេះ @FLOTUS និងខ្ញុំបានធ្វើតេស្តវិជ្ជមានសម្រាប់ជំងឺ COVID-19 ។ យើងនឹងចាប់ផ្តើមដំណើរការដាច់ដោយឡែក និងការព្យាបាលរបស់យើងភ្លាមៗ។ យើងនឹងជំនះវាទាំងអស់គ្នា!»

ជម្រាប់ដែរថា ការរកឃើញរបស់លោក ដូណាល់ ត្រាំ និងភរិយា បានកើតឡើងបន្ទាប់ពីជំនួយការជាន់ខ្ពស់របស់គាត់គឺអ្នកស្រី Hope Hicks បានតេស្ដវិជ្ជមានជាមួយជំងឺនេះ។ ចំណែកគូប្រជែងប្រធានាធិបតីរបស់គាត់គឺលោក Joe Biden និងភរិយា Jill Biden នៅតេស្ដអវិជ្ជមាននៅឡើយទេ៕

អត្ថបទ៖ លីដា
ប្រភព៖ Daily Mail