មេដឹកនាំយោធាអាមេរិកជាន់ខ្ពស់មួយចំនួនត្រូវធ្វើចត្តាឡីស័កខ្លួន បន្ទាប់ពីមេបញ្ជាការរងឆ្មាំសមុទ្របានតេស្តវិជ្ជមានជាមួយជំងឺកូវីដ១៩

មេដឹកនាំយោធាជាន់ខ្ពស់មួយចំនួនរបស់សហរដ្ឋអាមេរិកកំពុងធ្វើចត្តាឡីស័កដោយខ្លួនឯង បន្ទាប់ពីមន្ត្រីជាន់ខ្ពស់ម្នាក់បានធ្វើតេស្តវិជ្ជមានជំងឺ COVID-19 ។ ក្រសួងការពារជាតិបាននិយាយនៅថ្ងៃអង្គារនេះថា មេបញ្ជាការរងនៃកម្លាំងឆ្មាំសមុទ្រលោក Charles Ray បានតេស្តវិជ្ជមានជាមួយជំងឺ COVID-19 ហើយគាត់ធ្លាប់បានចូលរួមកិច្ចប្រជុំកាលពីសប្តាហ៍មុន ជាមួយមេដឹកនាំយោធាជាន់ខ្ពស់ដទៃទៀត។

ប្រភពបាននិយាយថា អ្នកមានទំនាក់ទំនងជិតស្និទ្ធិពីការប្រជុំនោះ សុទ្ធតែត្រូវនៅដាច់ដោយឡែកដើម្បីតាមដានសុខភាព។ ពួកគេរួមបញ្ចូលទាំងប្រធានអគ្គសេនាធិការចម្រុះ លោកឧត្ដមសេនីយ Mark Milley, ប្រធានបុគ្គលិកនៃកងទ័ពអាកាស លោកឧត្ដមសេនីយ Charles Brown និងប្រធានប្រតិបត្តិការអវកាស លោកឧត្តមសេនីយ៍ John Raymond។​ ប្រព័ន្ធផ្សព្វផ្សាយអាមេរិកនិយាយថា មន្រ្តីកំពូលៗផ្សេងទៀតនៅក្នុងជួរកងទ័ព​ កងទ័ពជើងទឹក និងបញ្ជាការដ្ឋានសម្រាប់ការវាយប្រហារតាមប្រព័ន្ធអ៊ីនធឺណេត (Cyber) ក៏នៅដាច់ដោយឡែកដែរ។

ប្រព័ន្ធផ្សព្វផ្សាយមួយចំនួនបានលើកឡើងពីការព្រួយបារម្ភអំពីការត្រៀមប្រយុទ្ធ ប៉ុន្តែមន្ទីរប៉ង់តាហ្គោននិយាយថា គ្មានការផ្លាស់ប្តូរចំពោះការត្រៀមប្រតិបត្តិការ ឬសមត្ថភាពបេសកកម្មរបស់យោធានោះទេ ដោយនិយាយថា មេធំៗទាំងនោះមានសមត្ថភាពបំពេញបេសកកម្ម និងបំពេញភារកិច្ចរបស់ខ្លួនពីទីតាំងផ្សេងៗ៕

អត្ថបទ៖ លីដា
ប្រភព៖ NHK