ព្យុះត្រូពិក Goni បានសម្លាប់មនុស្សយ៉ាងហោចណាស់ ១០នាក់ហើយនៅក្នុងប្រទេសហ្វីលីពីន

អាជ្ញាធរហ្វីលីពីនបាននិយាយថា យ៉ាងហោចណាស់មានមនុស្ស ១០នាក់ បានស្លាប់ នៅពេលដែលព្យុះត្រូពិច Goni បានធ្វើដំណើរឆ្លងកាត់កោះ Luzon របស់ប្រទេស។ ព្យុះត្រូពិច Goni បានធ្វើឱ្យមានការបាក់ដីនៅថ្ងៃអាទិត្យ ពោលគឺវាបាននាំមកនូវភ្លៀងធ្លាក់ខ្លាំង និងខ្យល់បក់ខ្លាំង ដែលបង្កឱ្យមានការបាក់ដី ទឹកជំនន់ពាសពេញតំបន់ និងផ្ទះជាច្រើនបានលិចលង់។ អាជ្ញាធរឆ្លើយតបនឹងគ្រោះមហន្តរាយនិយាយថា មនុស្សប្រហែល ៣៩០,០០០ នាក់ កំពុងជ្រកកោននៅតាមសាលារដ្ឋ និងកន្លែងផ្សេងៗទៀតផងដែរ។

ប្រព័ន្ធផ្សព្វផ្សាយក្នុងស្រុករាយការណ៍ថា បញ្ហានេះក៏កំពុងធ្វើឱ្យមានការព្រួយបារម្ភអំពីការរីករាលដាលនៃជំងឺ COVID-19 ដោយសារថាប្រទេសនេះ គឺជាប្រទេសក្នុងតំបន់អាស៊ីអាគ្នេយ៍ដែលមានការឆ្លងរាលដាលជំងឺខ្លាំងបំផុត ខណៈកន្លែងខ្លះបានផ្ទុកមនុស្សលើសសមត្ថភាព។ អាជ្ញាធរក៏កំពុងស៊ើបអង្កេតរបាយការណ៍ ទាក់ទងនឹងផ្ទះដែលត្រូវបានជាប់នៅក្នុងការរអិលបាក់ដីផងដែរ។

ទីភ្នាក់ងារឧតុនិយមរបស់ប្រទេសជប៉ុននិយាយថា ព្យុះត្រូពិកមួយទៀតឈ្មោះ Atsani ក៏កំពុងវិវត្តនៅលើដែនទឹកភាគខាងកើតនៃប្រទេសហ្វីលីពីន។ ទីភ្នាក់ងារនេះនិយាយថា គេរំពឹងថាព្យុះ Atsani នឹងឆ្ពោះទៅកោះ Luzon នៅថ្ងៃព្រហស្បតិ៍ ខណៈដែលកំពុងទទួលបានកម្លាំងជាបណ្តើរៗ៕

អត្ថបទ៖ លីដា
ប្រភព៖ NHK