កាត់បន្ថយអាការៈឈឺចាប់ ឬហើមជើងបានយ៉ាងឆាប់រហ័ស ដោយគ្រាន់តែអនុវត្តន៍តាមលំហាត់ប្រាណងាយៗទាំងនេះ

មនុស្សសឹងតែគ្រប់គ្នាហើយដែលធ្លាប់ជួបប្រទះអាការៈហើម ខ្សោយកម្លាំង និងឈឺចាប់ក្នុងជើងរបស់ពួកគេ។ បញ្ហានេះភាគច្រើនកើតឡើងចំពោះអ្នកដែលឈរយូរ ឬរស់នៅក្នុងរបៀបមួយដែលមិនសមស្រប។ ខាងក្រោមជាលំហាត់ប្រាណងាយៗមួយចំនួនដែលមានប្រសិទ្ធិភាពកាត់បន្ថយអាការៈការឈឺជើងត្រឹមមួយពព្រិចភ្នែក ប៉ុន្តែដើម្បីទទួលបានលទ្ធផលកាន់តែប្រសើរចូរព្យាយាមអនុវត្តន៍ឲ្យបានទៀងទាត់ ៖

១. លំហាត់ប្រាណទី ១ ៖ ឈរត្រង់ ហើយដាក់ជើងផ្អឹបជិតគ្នា។ បន្ទាប់មកចាប់ផ្ដើមជំទើតជើងឲ្យខ្ពស់បំផុតតាមដែលអាចធ្វើទៅបាន ហើយទប់ខ្លួនក្នុងសភាពបែបនេះសម្រាប់រយៈពេល ៣០ វិនាទីសិន សឹមទម្លាក់កែងជើង ឬដាក់ជើងឲ្យស្មើលើកម្រាលវិញ។ អនុវត្តន៍សារឡើងវិញពី ៥ ទៅ ១០ដង។

២. លំហាត់ប្រាណទី ២ ៖ បោះជើងស្ដាំទៅមុខដូចពេលអ្នកកំពុងឈានដើរមួយជំហាន។ បន្ទាប់មកបង្វិលជំទើតជើងឆ្វេងឲ្យដូចក្នុងរូបភាពបានបង្ហាញ ហើយឈរស្ងៀមបែបនេះសម្រាប់រយៈពេល ៣០ វិនាទី។ អនុវត្តន៍សារឡើងវិញឲ្យបាន ៥ ដង ចំពោះជើងម្ខាងៗ។

៣. លំហាត់ប្រាណទី ៣ ៖ ជាដំបូងត្រូវដាក់ដៃទាំងសងខាងទប់ទៅនឹងជញ្ជាំង បន្ទាប់មកជំទើតជើងស្ដាំ ចំណែកឯបាតជើងឆ្វេងត្រូវដាក់រាបស្មើនឹងកម្រាល។ ឈរស្ងៀមក្នុងសភាពបែបនេះសម្រាប់រយៈពេល ៣០ វិនាទី។ អនុវត្តន៍សារឡើងវិញឲ្យបាន ៣ ដងសម្រាប់ជើងម្ខាងៗ។

៤. លំហាត់ប្រាណទី ៤ ៖ សម្រាប់លំហាត់ប្រាណនេះអ្នកអាចអនុវត្តន៍ដោយឈរ ឬអង្គុយក៏បាន។ អ្វីដែលត្រូវធ្វើ គឺដាក់គ្រាប់បាល់ថេននីស ឬកូនបាល់នៅក្រោមបាតជើង។ បន្ទាប់មកព្យាយាមបំលាស់ទី ឬរំកិលកូនបាល់ចេញពីកែងជើងទៅម្រាមជើង។ អនុវត្តន៍សារឡើងវិញឲ្យបាន ៥០ ដងចំពោះជើងម្ខាងៗ។

៥. លំហាត់ប្រាណទី ៥ ៖ ដាក់កូនបាល់សម្រាប់ម៉ាស្សាលើដុំអេប៉ុងយ៉ូហ្កាមួយ។ បន្ទាប់មកដាក់ជើងរបស់លើបាល់ ដូច្នេះកូនបាល់នឹងស្ថិតក្រោមកជើង (ដូចក្នុងរូបភាពបានបង្ហាញ)។ រមៀលគ្រាប់បាល់ឲ្យគ្រប់ទិសសម្រាប់រយៈបេល ១០ វិនាទី រួចរុញ ឬសង្កត់វាទល់នឹងដុំអេប៉ុងយ៉ូហ្កាសម្រាប់រយៈពេល ៣ វិនាទី សឹមអនុវត្តន៍ដូចគ្នាសារឡើងវិញចំពោះជើងម្ខាងទៀត។ អនុវត្តន៍ឲ្យបាន ២ ដងចំពោះជើងម្ខាងៗ។ អ្នកអាចអនុវត្តន៍លំហាត់ប្រាណនេះចំពោះជើងទាំងសងខាងក្នុងពេលតែមួយក៏បាន។

៦. លំហាត់ប្រាណទី ៦ ៖ អង្គុយលើកម្រាល តម្រង់ខ្នងឲ្យត្រង់ ហើយដាក់ជើងទាំងសងខាងទៅខាងមុន។ ដាក់ខ្សែក្រវ៉ាត់ ឬក្រណាត់ជុំវិញជើងរបស់អ្នកដូចក្នុងរូបភាពបានបង្ហាញ។ លើកជើងទាំងសងខាងឡើង ដោយដៃទាំងសងខាងទប់ក្រណាត់ ឬខ្សែក្រវ៉ាត់ឲ្យជាប់សម្រាប់រយៈពេល ៣០ វិនាទី។ អនុវត្តន៍សារឡើងវិញឲ្យបាន ៥ ដង។

៧. លំហាត់ប្រាណទី ៧ ៖ ដាក់ម្រាមជើងនៃជើងម្ខាងលើដុំអេប៉ុងយ៉ូហ្កា ឬអ្វីមួយដែលស្រដៀងនេះ ដូច្នេះកែងជើងរបស់អ្នក គឺស្ថិតលើកម្រាល។ ទ្រេតខ្លួនទៅមុខ ដោយប្រើម្រាមជើងនៃជើងម្ខាងនោះដើម្បីទប់ទម្ងន់ខ្លួនសម្រាប់រយៈពេល ៣០ វិនាទី សឹមអនុវត្តន៍ដូចគ្នាសារឡើងវិញចំពោះជើងម្ខាងទៀត។ អនុវត្តន៍សារឡើងវិញឲ្យបាន ៥ ដង សម្រាប់ជើងម្ខាងៗ។

៨. លំហាត់ប្រាណទី ៨ ៖ លំហាត់ប្រាណនេះជួយផ្ដល់ភាពធូរស្បើយដល់ជើង និងបំបាត់អាការៈហើម។ គេងរាបស្មើទល់នឹងជញ្ជាំងដោយដាក់ដៃទាំងសងខាងស្របនឹងដងខ្លួន ហើយចាប់ផ្ដើមលើកជើងឡើងឲ្យត្រូវនឹងមុំនៃរាងកាយដូចក្នុងរូបភាពបានបង្ហាញ។ នៅស្ងៀមក្នុងសភាពបែបនេះសម្រាប់រយៈពេលពី ១៥ ទៅ ២០ នាទី។ អនុវត្តន៍សារឡើងវិញឲ្យបានពី ២ ទៅ ៣ ក្នុងមួយថ្ងៃ៕

អត្ថបទ ៖ ប៊ី

ប្រភព ៖ Brightside