អតីតខ្សែការពាររបស់ក្រុមជម្រើសជាតិអាហ្សង់ទីនកីឡាករ Pablo Zabaleta បានលើកឡើងថា៖ ខ្សែប្រយុទ្ធ Lionel Messi អាចនឹងចូលនិវិត្តន៍ពីក្រុមជម្រើសជាតិអាហ្សង់ទីន ប្រសិនបើអាហ្សង់ទីនទទួលរងបរាជ័យនៅក្នុងព្រឹតិ្តការណ៍បាល់ទាត់ពិភពលោក FIFA World Cup នៅក្នុងឆ្នាំនេះ។

កាលពីម្សិលមិញក្រុមជម្រើសជាតិអាហ្សង់ទីនបានប្រកួតចាញ់ក្រុមជម្រើសជាតិក្រូអាតយ៉ាងអាម៉ាស់មុខបំផុតដោយបញ្ចប់ដោយលទ្ធផល ក្រូអាត យកឈ្នះ អាហ្សង់ទីន 3-0។ ការចាញ់របស់អាហ្សង់ទីនកាលពីម្សិលមិញនេះគឺជាកំណត់ត្រាដ៏អាក្រក់មួយរបស់អាហ្សង់ទីននៅក្នុងព្រឹតិ្តការណ៍បាល់ទាត់ពិភពលោក FIFA World Cup ខណៈដែលលោក Jorge Sampaoli ដែលជាគ្រូបង្វឹករបស់ក្រុមជម្រើសជាតិអាហ្សង់ទីនត្រូវបានគេចោទប្រកាន់ថាជាអ្នកបង្កើតរឿងដ៏អាក្រក់នេះ។

នៅក្នុងការប្រកួតកាលពីម្សិលមិញរបស់អាហ្សង់ទីន អតីតខ្សែការពាររបស់ក្រុមជម្រើសជាតិអាហ្សង់ទីនកីឡាករ Pablo Zabaleta មានការភ្ញាក់ផ្អើលយ៉ាងខ្លាំងចំពោះទម្រង់លេងដ៏អាក្រក់របស់អាហ្សង់ទីនប្រកួតជាមួយនឹងក្រូអាតកាលពីយប់មិញ។

កាលពី 2 ឆ្នាំមុនខ្សែប្រយុទ្ធ Lionel Messi បានប្រកាសចូលនិវិត្តន៍ពីក្រុមជម្រើសជាតិអាហ្សង់ទីនម្ដងរួចមកហើយ បន្ទាប់ពីរូបគេមិនអាចជួយឲ្យក្រុមជម្រើសជាតិអាហ្សង់ទីនឈ្នះពានរង្វាន់ ខណៈដែល Messi ជួយឲ្យអាហ្សង់ទីនឡើងវគ្គផ្ដាច់ព្រ័ត្រចំនួន 3 ដងជាប់ៗគ្នា។ ហើយនៅក្នុងឆ្នាំនេះខ្សែប្រយុទ្ធ Lionel Messi ដែលមានអាយុ 31 ឆ្នាំនៅក្នុងថ្ងៃអាទិត្យនេះអាចនឹងប្រកាសចូលនិវិត្តន៍ម្ដងទៀត ប្រសិនបើ អាហ្សង់ទីន ធ្លាក់នៅក្នុងព្រឹតិ្តការណ៍បាល់ទាត់ពិភពលោក FIFA World Cup នៅរុស្សីឆ្នាំនេះ។ អាចនិយាយថា World Cup ឆ្នាំនេះគឺជាការប្រកួតចុងក្រោយរបស់ Messi ជាមួយនឹងក្រុមជម្រើសជាតិអាហ្សង់ទីន។

ខ្សែការពារ Zabaleta បាននិយាយប្រាប់សារពត៌មាន BBC ថា៖ ខ្ញុំមានអារម្មណ៍សោកស្ដាយយ៉ាងខ្លាំងចំពោះ Messi នេះគឺជាឱកាសចុងក្រោយរបស់ Messi ជាមួយនឹងអាហ្សង់ទីន ប៉ុន្ដែខ្ញុំមិនមានអ្វីភ្ញាក់ផ្អើលចំពោះការចូលនិវិត្តន៍របស់ Messi ទេ។ ខ្ញុំដឹងថាពេលនេះ Messi គាត់ខកចិត្តយ៉ាងខ្លាំងចំពោះអ្វីៗដែលបានកើតឡើងនៅពេលនេះ ហើយពេលនេះគាត់កំពុងទទួលរងសម្ពាធដ៏ធ្ងន់មួយ។

បុត្រ

ប្រភព៖ Goal