ការប្រកួតពានរង្វាន់បាល់ទាត់ពិភពលោក FIFA World Cup នៅប្រទេសរុស្សីវគ្គ 16 ក្រុមចុងក្រោយនឹងចាប់ផ្ដើមនៅក្នុងរាត្រីនេះ ខណៈដែល អាហ្សង់ទីន ប៉ះជាមួយនឹង បារាំង គឺជាគូរបើកឆាកនៅក្នុងវគ្គ 16 ក្រុមចុងក្រោយនេះ។

ជំនួបរវាង អាហ្សង់ទីន និង បារាំង អាចនិយាយថាគឺជាការប្រកួតដ៏ជក់ចិត្តនៅក្នុងវគ្គ 16 ក្រុមចុងក្រោយនេះ។ ក្រុមទាំងពីរធ្លាប់មានប្រវតិ្តជួបគ្នា 4 ដងប៉ុន្ដែនៅក្នុងជំនួបទាំង 4 ដងនោះក្រុមជម្រើសជាតិបារាំងមិនដែលយកឈ្នះក្រុមជម្រើសជាតិអាហ្សង់ទីនម្ដងណាឡើយ ពោលនៅក្នុងជំនួបទាំង 4 ដងនោះគឺអាហ្សង់ទីនយកឈ្នះបារាំងទាំង 4 ដង។ ប្រវតិ្តជួបគ្នារវាងក្រុមទាំងពីរមានដូចជា៖
1. ថ្ងៃទី 12/02/2009 អាហ្សង់ទីន 2-0 បារាំង
2. ថ្ងៃទី 08/02/2007 អាហ្សង់ទីន 1-0 បារាំង
3. ថ្ងៃទី 06/06/1978 អាហ្សង់ទីន 2-1 បារាំង
4. ថ្ងៃទី 16/07/1930 អាហ្សង់ទីន 1-0 បារាំង។

រង់ចាំមើលថានៅក្នុងរាត្រីនេះ តើបារាំងអាចកែប្រែប្រវតិ្តសាស្រ្ដរបស់ខ្លួនបានដែរឫទេ ខណៈដែលជំនួបជួបគ្នា 4 ដងបារាំងមិនដែលយកឈ្នះអាហ្សង់ទីនទល់តែសោះ។ ការប្រកួតរវាងក្រុមទាំងពីរនេះនឹងចាប់ផ្ដើមនៅវេលាម៉ោង 9:00 យប់នេះ។

គួរបញ្ជាក់ឡើងវិញដែរថា នៅក្នុងវគ្គ 16 ក្រុមចុងក្រោយនេះគឺធ្វើការប្រកួតតែ 1 ជើងតែប៉ុណ្ណោះ អ្នកឈ្នះបន្ដដំណើរទៅវគ្គ 8 ក្រុមចុងក្រោយ ចំណែកឯអ្នកចាញ់ត្រូវត្រលប់ទៅផ្ទះវិញ។

បុត្រ