កាលពីម្សិលមិញនេះ ខ្សែបម្រើ Marouane Fellaini បានចុះហត្ថលេខាបន្ដកុងត្រាជាមួយនឹងក្លឹបបិសាចក្រហម Manchester United ដល់ឆ្នាំ 2020។

ការបន្ដកុងត្រាថ្មីរបស់ខ្សែបម្រើសញ្ជាតិប៊ែលហ្ស៊ិករូបនេះគឺបញ្ចប់ពាក្យចចាមអារាមដែលថារូបគេនឹងចាកចេញពីក្លឹបបិសាចក្រហម Manchester United ពេលការប្រកួតពានរង្វាន់បាល់ទាត់ពិភពលោក FIFA World Cup បានបញ្ចប់។

មុនពេលចុះហត្ថលេខាបន្ដកុងត្រាថ្មីជាមួយនឹងក្លឹបបិសាចក្រហម Manchester United ខ្សែបម្រើ Marouane Fellaini ត្រូវបានសារពត៌មានជាច្រើនចុះផ្សាយថារូបគេអាចនឹងចាកចេញពី Man Utd ទៅកាន់ក្លឹបកាំភ្លើងធំ Arsenal, AC Milan និង Galatasaray ជាដើម។

ខ្សែបម្រើ Fellaini បាននិយាយសារពត៌មានកីឡារបស់ក្លឹបថា៖ ខ្ញុំមានសេចក្តីរីករាយណាស់ដែលបានបន្តការធ្វើដំណើររបស់ខ្ញុំក្នុងនាមជាកីឡាកររបស់បិសាចក្រហម Manchester United។ ខ្ញុំបានធ្វើការសំរេចចិត្តនេះពីព្រោះខ្ញុំសប្បាយចិត្តណាស់នៅទីនេះ ហើយខ្ញុំមានអារម្មណ៍ថាក្រុមនេះក្រោមការដឹកនាំរបស់លោក Jose នៅតែមានអ្វីដែលយើងចង់បាន។ ខ្ញុំសូមថ្លែងអំណរគុណពិសេសចំពោះលោក Jose ចំពោះសេចក្ដីជឿទុកចិត្តដែលគាត់តែងតែបង្ហាញមកលើខ្ញុំ។ ការផ្តោតអារម្មណ៍របស់ខ្ញុំពេលនេះគឺនៅលើការប្រកួត World Cup ហើយខ្ញុំកំពុងទន្ទឹងរង់ចាំរដូវកាលដ៏ជោគជ័យមួយនៅខាងមុខនេះមកដល់។ 

បុត្រ

ប្រភព៖ Goal