លោកតាវ័យ ៨២ ឆ្នាំរូបនេះគឺជាពលរដ្ឋដំបូងគេបង្អស់ ដែលបានទទួលវ៉ាក់សាំងប្រឆាំងជំងឺកូវីដ១៩ របស់ក្រុមហ៊ុន AstraZeneca និងសាកលវិទ្យាល័យ Oxford ជាផ្លូវការ

យោងតាមការចុះផ្សាយរបស់សារព័ត៌មាន The Guardian បានឱ្យដឹងថា ប្រធានផ្នែកថែទាំចូលនិវត្តន៍អាយុ ៨២ឆ្នាំម្នាក់ បានក្លាយជាមនុស្សដំបូងគេនៅលើពិភពលោក (ក្រៅពីការធ្វើតេស្ដសាកល្បង) ដែលបានទទួលវ៉ាក់សាំងបង្ការជំងឺ COVID-19 របស់សាកលវិទ្យាល័យ Oxford និងក្រុមហ៊ុន AstraZeneca ។ លោកតាម្នាក់នេះមានឈ្មោះថា Brian Pinker គាត់បានទទួលវ៉ាក់សាំងនេះនៅម៉ោង ៧ និង ៣០ នាទីព្រឹកថ្ងៃច័ន្ទនេះ ពីគិលានុបដ្ឋាយិកាឈ្មោះ Sam Foster នៅមន្ទីរពេទ្យ Churchill នៃសាកលវិទ្យាល័យ Oxford របស់ NHS ។

ក្រោយពីទទួលបានវ៉ាក់សាំងរួចហើយនោះ លោកតា Brian Pinker បាននិយាយថា វ៉ាក់សាំងនេះបានធ្វើឱ្យគាត់ស្ងប់ចិត្ត ខណៈដែលគាត់ផ្ទាល់ក៏កំពុងបន្ដព្យាបាលជំងឺប្រចាំកាយផងដែរ។ បន្ទាប់ពីនេះគាត់ក៏សង្ឃឹមថា នឹងបានធ្វើខួបអាពាហ៍ពិពាហ៍លើកទី៤៨ ដោយគ្មានទុក្ខកង្វល់ជាមួយនឹងប្រពន្ធរបស់គាត់គឺលោកយាយ Shirley ដែលនឹងប្រព្រឹត្តនៅខែកុម្ភៈខាងមុខនេះ។ លោកតាថែមទាំងបាននិយាយទាំងមានមោទនភាពថា លោកពិតជារីករាយដែលវ៉ាក់សាំងនេះត្រូវបានបង្កើតនៅ Oxford ដែលជាទីកំណើតរបស់គាត់ផ្ទាល់។

ជម្រាបដែរថា វ៉ាក់សាំងរបស់ក្រុមហ៊ុន AstraZeneca និងសាកលវិទ្យាល័យ Oxford គឺទើបតែទទួលបានការអនុញ្ញាតឱ្យប្រើប្រាស់ជាបន្ទាន់ ដោយរដ្ឋាភិបាលអង់គ្លេសនាពេលថ្មីៗនេះប៉ុណ្ណោះ។ ពោលគឺវ៉ាក់សាំងនេះទើបតែទទួលបានការអនុញ្ញាតកាលពីថ្ងៃទី៣០ ខែធ្នូ ឆ្នាំ២០២០ កន្លងទៅ នៅក្នុងអ្វីដែលរដ្ឋាភិបាលអង់គ្លេសហៅវាថា ជាការអនុវត្តចំគោលដៅ ដើម្បីទប់ស្កាត់ការរីករាលដាលនៃជំងឺ COVID-19 ក៏ដូចជាការបង្កើនចំនួនវ៉ាក់សាំង សម្រាប់ចាក់បង្ការដល់ពលរដ្ឋអង់គ្លេសទាំងមូល៕

អត្ថបទ៖ លីដា
ប្រភព៖ The Guardian