លោក ចូ បៃដិន ដែលមានវ័យ ៧៨ឆ្នាំ គ្រោងនឹងចូលស្បថក្នុងនាមជាប្រធានាធិបតីទី៤៦ របស់សហរដ្ឋអាមេរិក នៅថ្ងៃពុធ ទី២០ ខែមករា ឆ្នាំ២០២១ (ម៉ោងនៅអាមេរិក)។ ពិធីសម្ពោធដែលមានប្រធានបទ «អាមេរិក យូណាយធីត» នឹងត្រូវធ្វើឡើងនៅទីក្រុងវ៉ាស៊ីនតោន ហើយលោក ចូ បៃដិន នឹងក្លាយជាប្រធានាធិបតីចាស់ជាងគេក្នុងប្រវត្តិសាស្ត្រអាមេរិក។ បន្ទាប់ពីធ្វើសច្ចាប្រណិធានរួច លោក ចូ បៃដិន នឹងថ្លែងសុន្ទរកថាបើកសម្ពោធរបស់លោក ហើយត្រូវបានគេរំពឹងថា នឹងបន្តអំពាវនាវឱ្យមានការរួបរួមគ្នាក្នុងចំណោមជនជាតិអាមេរិកាំង។

សន្តិសុខមានសភាពតឹងតែងខ្លាំងនៅទីក្រុងវ៉ាស៊ីនតោន បន្ទាប់ពីការឡោមព័ទ្ធវិមានកាពីតូលដោយក្រុមអ្នកគាំទ្រប្រធានាធិបតីលោក ដូណាល់ ត្រាំ កាលពីពេលកន្លងទៅ ហើយកងទ័ពឆ្មាំជាតិ និងបុគ្គលិកប្រដាប់អាវុធដទៃទៀត កំពុងយាមការពារវិមានកាពីតូលនៅថ្ងៃសម្ពោធនោះ។ អតីតប្រធានាធិបតីរួមមានលោក បារ៉ាក់ អូបាម៉ា និងលោក ចច ដាប់ប៊លយូប៊ូស ក៏ដូចជាអនុប្រធានាធិបតីលោក Mike Pence ក៏គ្រោងនឹងចូលរួមក្នុងពិធីនេះផងដែរ។

ប៉ុន្តែលោក ដូណាល់ ត្រាំ បានប្រកាសរួចហើយថាលោកនឹងមិនចូលរួមទេ ដែលធ្វើឱ្យលោកក្លាយជាប្រធានាធិបតីដំបូង ក្នុងរយៈពេលប្រហែល ១៥០ឆ្នាំ ដែលមិនទៅចូលរួមថ្ងៃសម្ពោធតំណែងប្រធានាធិបតីថ្មី។ យ៉ាងណាក្បួនដង្ហែប្រពៃណីចេញពីវិមានកាពីតូល រហូតដល់សេតវិមាន ត្រូវបានលុបចោលដោយសារតែជំងឺរាតត្បាត COVID-19 ហើយផ្សារទំនើបជាតិ ដែលជាទីលាននៅមុខវិមានកាពីតូល ជាធម្មតាមានផ្ទុកអ្នកទស្សនា ប៉ុន្តែពេលនេះវាត្រូវបានបិទដើម្បីសុវត្ថិភាព៕

អត្ថបទ៖ លីដា
ប្រភព៖ NHK