ទីបំផុតលោក Jack Ma បានបង្ហាញខ្លួនជាលើកដំបូង បន្ទាប់ពីបានបាត់ខ្លួនរយៈពេល ៣ខែ ចាប់តាំងពីខែតុលា

ស្ថាបនិកក្រុមហ៊ុន Alibaba Group លោក Jack Ma បានជួបជាមួយគ្រូៗនៅតាមជនបទក្នុងប្រទេសចិនចំនួន ១០០នាក់ តាមរយៈជំនួបតាមវីដេអូ នៅថ្ងៃពុធ ទី២០ ខែមករា ឆ្នាំ២០២១នេះ ដែលជាការបង្ហាញខ្លួនលើកដំបូងរបស់គាត់ចាប់តាំងពីខែតុលា។ ជម្រាបដែរថា បណ្ដាញសង្គមមានការសង្ស័យពីអវត្តមានរបស់គាត់ក្នុងរយៈពេលថ្មីៗនេះ បន្ទាប់ពីមានសេចក្តីរាយការណ៍ថា គាត់បានខកខានវគ្គចុងក្រោយនៃកម្មវិធីទូរទស្សន៍មួយ ដែលគាត់គឺជាអ្នកវិនិច្ឆយក្នុងកម្មវិធីនោះ ចំពេលមានការគៀបសង្កត់បទប្បញ្ញត្តិដោយទីក្រុងប៉េកាំង ស្តីអំពីអាណាចក្រជំនួញដែលរីកដុះដាលរបស់គាត់។

លោក Jack Ma មិនបានបង្ហាញខ្លួនជាសាធារណៈនោះទេ ចាប់តាំងពីវេទិកានៅទីក្រុងសៀងហៃ នៅចុងខែតុលា ឆ្នាំ២០២០ ដែលទីនោះជាកន្លែងដែលគាត់បានស្តីបន្ទោសប្រព័ន្ធច្បាប់របស់ចិននៅក្នុងសុន្ទរកថា ដែលធ្វើឱ្យគាត់មានការប៉ះទង្គិចគ្នាជាមួយមន្រ្តី ដែលនាំឱ្យមានការផ្អាកការផ្ដល់ជូន IPO តម្លៃ ៣៧ ពាន់លានដុល្លារ នៃសម្ព័ន្ធភាពហិរញ្ញវត្ថុ Ant Group របស់ក្រុមហ៊ុន Alibaba ។

នៅក្នុងវីដេអូដែលគាត់បានបង្ហាញខ្លួននេះ លោក Jack Ma បានថ្លែងទៅកាន់គ្រូៗ ដែលទទួលបានពានរង្វាន់គ្រូនៅជនបទ (Rural Teachers Award) ដែលកាលពីឆ្នាំមុនៗគាត់តែងបានចូលរួមពិធីនេះ ដែលរៀបចំឡើងដោយមូលនិធិ Jack Ma នៅទីក្រុងសាន់យ៉ានៃប្រទេសចិន។ លោកបាននិយាយនៅក្នុងវីដេអូថា៖«យើងមិនអាចជួបគ្នានៅក្រុងសាន់យ៉ាពេលនេះបាន ដោយសារតែការរីករាលដាលនៃជំងឺ COVID-19 ។ នៅពេលដែលជំងឺរាតត្បាតបានបញ្ចប់ យើងត្រូវតែរកពេលវេលា ដើម្បីរៀបចំខ្លួនសម្រាប់ដំណើររបស់អ្នករាល់គ្នាទៅកាន់ក្រុងសាន់យ៉ា ហើយបន្ទាប់មកយើងនឹងជួបគ្នាម្តងទៀត!»៕

អត្ថបទ៖ លីដា
ប្រភព៖ Channel News Asia