ទៅដល់ Juventus ភ្លាម Ronaldo ប្រាប់ពីមូលហេតុដែលនាំឲ្យរូបលោកចាកចេញពីក្លឹប Real Madrid មកកាន់ក្លឹប Juventus

កាលពីម្សិលមិញនេះខ្សែប្រយុទ្ធ Cristiano Ronaldo បានធ្វើដំណើរទៅដល់ក្លឹបសេះបង្កង់ Juventus ជាផ្លូវហើយ នៅក្នុងសន្និសីទកាសែតជាមួយនឹងក្លឹបសេះបង្កង់ Juventus នោះខ្សែប្រយុទ្ធ Cristiano Ronaldo បានលើកយកមូលហេតុមួយដែលធ្វើឲ្យរូបលោកចាកចេញពីក្លឹប Real Madrid។

ខ្សែប្រយុទ្ធ Ronaldo ដែលអ្នកគ្រប់គ្នាស្គាល់ឈ្មោះគាត់ថា CR7 នោះបានមកដល់ទឹកដី Turin របស់ប្រទេសអ៊ីតាលីកាលពីម្សិលមិញដើម្បីចុះហត្ថលេខាជាមួយនឹងក្លឹបសេះបង្កង់ Juventus ក្នុងការផ្ទេរពីក្លឹបអធិរាជសរ Real Madrid មកកាន់ Juventus ក្នុងកុងត្រារយៈពេល 4 ឆ្នាំដែលមានតម្លៃផ្ទេរដល់ទៅ 100លានអឺរ៉ូ។ ការផ្ទេររបស់ Ronaldo មកកាន់ក្លឹប Juventus នេះកំពុងធ្វើឲ្យអ្នកគាំទ្រវិស័យកីឡាជុំវិញពិភពលោកមានការជ្រួលច្របល់ រហូតធ្វើឲ្យមានអ្នកគាំទ្រ Real Madrid ខ្លះឈប់គាំទ្រ Real Madrid ងាកមកគាំទ្រក្លឹប Juventus វិញ។

នៅក្នុងសន្និសីទកាសែតរបស់ខ្សែប្រយុទ្ធ Cristiano Ronaldo ជាមួយនឹងក្លឹបសេះបង្កង់ Juventus កាលពីម្សិលមិញនោះ Ronaldo បាននិយាយថា៖ មូលហេតុដែលលោកសម្រេចចិត្តចាកចេញពីក្លឹប Real Madrid នោះគឺដើម្បីរូបលោកចង់មានដៃគូរប្រជែងច្រើនជាងមុន។ ហើយជាពិសេសរូបលោកចង់ចូលនិវិត្តន៍នៅក្នុងក្លឹបធំៗជាជាងចូលនិវិត្តន៍នៅក្នុងលីគកំពូលចិនឫក៏ក្លឹបរបស់ប្រទេសកាតា។

ការចាកចេញពីរបស់លោកពីក្លឹប Real Madrid នេះគឺមិនបានធ្វើឲ្យរូបលោកមានភាពមិនសប្បាយចិត្តទេ ដោយសារតែក្លឹបដ៏ធំមួយនេះមានកីឡាករដ៏គួរឲ្យគោរពច្រើន ហើយលោកក៏អរគុណដល់ Juventus ដែលអនុញ្ញាតឲ្យរូបលោកចូលរួមជាមួយនឹងក្លឹបដ៏ធំមួយនេះ។

Ronaldo បានបន្ថែមថា៖ លោកមានអារម្មណ៍ថាល្អប្រសើរដែលមានវត្តមាននៅទីនេះ ព្រោះវាជាការប្រកួតប្រជែងដ៏ធំមួយនិងការប្រកួតដ៏ស្វិតស្វាញបំផុត ហើយរូបលោកបានត្រៀមខ្លួនរួចជាស្រេច។ អាយុមិនជាថ្វីទេសម្រាប់រូបលោក។ លោកតែងតែមានអារម្មណ៍ល្អនិងលើកទឹកចិត្តខ្លួនឯងហើយខិតខំឲ្យអស់ពីសមត្ថភាព ជាពិសេសលោកចង់ឈ្នះពានរង្វាន់ជាមួយនឹង Juventus។

បុត្រ

ប្រភព៖ Goal