បិសាចក្រហម Man Utd និងតោខៀវ Chelsea ត្រៀមប្រជែងគ្នាដណ្ដើមអ្នកចាំទី Alisson ពីក្លឹប Roma នៅក្នុងរដូវក្ដៅខាងមុខនេះ

ក្លឹបបិសាចក្រហម Manchester United និងក្លឹបតោខៀវ Chelsea នឹងចូលរួមប្រជែងគ្នាដណ្ដើមអ្នកចាំទី Alisson របស់ក្លឹបឆ្មាខ្មៅ Roma ប្រសិនបើក្លឹបទាំងពីរនេះបាត់បង់អ្នកចាំទីរបស់ខ្លួននៅក្នុងទីផ្សារដោះដូរកីឡាកររដូវក្ដៅខាងមុខនេះ។

អ្នកចាំទីរបស់ក្លឹបយក្សអង់គ្លេសទាំងពីរ ទាំងអ្នកចាំទី David De Gea និងអ្នកចាំទី Thibaut Courtois សុទ្ធតែមានទំនាក់ទំនងជាមួយនឹងក្លឹងអធិរាជសរ Real Madrid។ ក្លឹបអធិរាជសរ Real Madrid បានដាក់អ្នកចាំទី David De Gea ជាគោលដៅសំខាន់ទី 1 និងអ្នកចាំទី Thibaut Courtois ជាគោលដៅសំខាន់ទី 2 នៅក្នុងពេលទីផ្សារដោះដូរកីឡាកររដូវក្ដៅខាងមុខនេះ។ ក្លឹបអធិរាជសរ Real Madrid ចង់បានអ្នកចាំទីរបស់ក្លឹបទាំងពីរនេះគឺដើម្បីត្រៀមជំនួសដំណែងអ្នកចាំទី​ Keylor Navas ដែលក្លឹបប្រុងនឹងលក់ចេញនៅក្នុងពេលទីផ្សារដោះដូរកីឡាកររដូវក្ដៅខាងមុខនេះ។

ក្លឹបបិសាចក្រហម Manchester United និងក្លឹបតោខៀវ Chelsea ក្នុងចំណោមក្លឹបទាំងពីរនេះកំពុងមានក្លឹបមួយត្រៀមចិត្តក្នុងការបាត់បង់អ្នកចាំទីរបស់ខ្លួន។ ពេលនេះក្លឹបយក្សរបស់អង់គ្លេសទាំងពីរនេះនឹងត្រៀមខ្លួនប្រជែងគ្នាដណ្ដើមអ្នកចាំទី Alisson ពីក្លឹបឆ្មាខ្មៅ Roma ខណៈដែលក្លឹប Roma កាលពីប៉ុន្មានសប្ដាហ៍មុនបានដាក់តម្លៃខ្លួនអ្នកចាំទីសញ្ជាតិប្រេស៊ីលរូបនេះក្នុងតម្លៃផ្ទេ​រ 90លានអឺរ៉ូ។

បុត្រ

ប្រភព៖ Goal